سوق التكينة ومنتدي السريحة

سبحان مغير الاحوال من حال الي حال بعد ما كان سوق السريحة وسوق التكينة وسوق المسيد وسوق المعيلق وسوق وداروة (وسوق البشاقرة زمان ربنا يعيدو ليهم سالما غانما )اصبحت الان بقدرة قادر الي منتديات شوفو الدنيا اتغيرت ازاي شوفو العولمة اصبحت بتعمل شنو الدنيا اتلخبطت الكون اصبح غرفة صغيرة جدا منها تدور وتلف علي كل اركان الدنيا ولم احلم يوما واحد ان اكون متجولا في كل انحاء الدنيا عبر جهاز صغير جدا .
اعود للاسواق كيف تحولت بقدرة قادرالي منتديات كلنا بيعرف انو سوق ودراوة يوم السبت والتلاتا وسوق السريحة يوم الاحد والاربعاء وسوق التكينة (يوم شنو زاتو ما عارفو )وسوق المسيد الاثنين الخميس كل هذه الاسواق كانت تجمع كل اهل منطقة شمال الجزيرة رغم اختلاف الاسواق ولكن الغرض الاول هو تجارة وتبادل المصالح مع بعض والغرض الثاني اجتماعي هو تلاقي وتواصل ومعرفة الاخبار من بعض وغير ذلك من المفيدات
ولكن اليوم تغير الحال بعد ما كان سوق السريحة بقي منتدي السريحة ومنتدي التكينة وممنتدي المسيد (هي انتو في دا ازرق ذاتا بقي عندها منتدي شوف ليك عوج زمن و انا خائف بكرة ناس الفقداب دوت كوم يجو ناطين وما بالك بي مركركة )وطبعا من ميزات المنتديات انها تستطيع ان تجعلك في تواصل اسفيري عبر هذا الكاين الكوني مع كل من تحب في اي زمان واي مكان تواصل بلا حدود ماسنجر غرف شات اي تواصل تريد وان شئت يمكنك ان تعيش مع افراد اسرتك ان كنت بعيدا عبر كاميرات ضغيرة يمكن توزيعها داخل البيت فتنقل لك وبتفاعل سريع كل حركات افراد اسرتك كانك معهم وحقا انه عالم جنوني عالم لا يعرف الياس او الخمول او النوم عالم يبحث عن الحقيقة عن معلومة ضايعة بين ملايين الكتب او مواقع النت عالم يتعمق في دهاليز العولمة للخروج بمكتشف جديد ليقول للاخرين انا هنا انا موجود عبر اكتشاف علمي جديد
اخوتي انظروا تحت اقدامكم للسير في الطريق الصحيح وهي التي تريكم ماذا ينتظك غدا اتركو الاحلام الوهمية لا تضيعو الزمن في اشياء لا تحقق عايدا يا كان نوعه الطموح ان تطوع الزمن فلا تجعله يقودك بلا دليل

تخريمة
انتو عارفين انو ناس البشاقرة لا عندهم سوق ولا منتدي مارقين ملوص 0000طيب آها دي يحلوها كيف بس ساي وروني

ديل انتو عارفين امشو قولو ليهم نحن دايرين نعمل ليكم منتدي يا فلوقكم يا جيتو سالمين

بالمنسبة يا ناس المنتدي انتو ما قاعدين تنزلو نكات ومواقف للعشاء و وبخيت ود حاج المهدي والجزولي وعمكم البقول (ماشاء الله) حتي الناس اللقاهم في السجن وكتير من الاسما انا ما بتذكرهم وبالمناسبة المنتدي اسمو السريحة وارجو ان تكون المواد والمواضيع من السريحة لان بالنت ما يكفيه من مواد ونحن دايرين مواد عن القري السودانية حتي يستفيد الجميع وركزوا علي المواضيع الشيقة والطرائف الحلوة واستخدام اسماء الالقاب في الحلة زي ناس شبعيتة كما قريت قبل شوية عنه
ويمتد التواصل معاكم
بالمناسبة انا بلقي راحتي في النت بالليل فقط
يعني بالنهار مافي لزحمة العمل

وبنجيكم صادين

لحن الختام

طبعا الايام قالوا
السريحة
وزرق
والفقداب
ان جيت زاير ليها ما بتشم
غير ريحة القراصة
لان قالوا القمح طلع
هييييييييييع

يا ابوعشرين انت واقع من جمل ولا شنو
براحة على الناس حبه حبه فى دقائق معدودة لخبطت الدنيا كلها
بعدين البشاقرة ياخي غنية عن التعريف ما محتاجة منتدى يكفيها مامون عثمان فى الشروق
اما الفقداب فيها حاجات اجمل من المنتدى فيها الطبيعة والعادات والتقاليد لسع محافظين عليها اي لسع ظاهرة التمدن ما جاتها وان شاء الله ما تجيها لانهم احسن ليهم كدا

لكن معاك حق فى سرد مواقف مضحكة لظرفاء السريحة مثل على ودحرمين والأمين ود على الله يرحمه وهيبة الله يرحمه وبرعي عبد المجيد وعبد المنعم عوض الجيد والعشاء وبخيت والجزولي كما ذكرت وهم كثيرين جدا ونعوعدك بذلك

التخريمات مافي ليها داعي وخليك اسم على مسمى
اسقي كل زرع اهلنا الطيب حتى تستفيد منك الحلة وجيرانها
ولا تكن ( خور) تجي من وراه المصايب ... تمتلك حرية التعبير هذا لا شك فيه لكن دون تجريح ..... ادفق واملاء براحاتنا بريحة الدعاش( طابت لك الحياة) Smile

يا ادمن انا ما راميني جمل
انا كت قاعد في كبري يعني علي الكنار ومنتظر عربية السوق وبالي بعيد وفجاءة لقيت نفسي غاطس جوة الترعة وملكك بالطين

يا ابو عشرين ممكن اكون حدد هويتك بنسبة 65% من قعدة الكنار وانتظار بكاسي السوق دي ( الاخ من الذين سكنو داخلية المعيلق ... التحية لاهلها الطيبين) واكيد بتعرف ( كجك ) ( وعم بشارة ) و ( حسن الصول ) و ( وحاجة بت الكور ) الله يطراهم بالخير، آهـ ... زمن جميل ( ليت الماضي يعود يوما فاخبره بما فعل الاغتراب) Smile

[size=24]

والله بت الكور دي بعرفا لكن الباقين ابقي لي بي عمرة وزوغة ما بعرفهم

كدي اكان عندك كدارة اديني ليها

طبعا هنا في زوول انا ما بجيب اسموا اكان جنو يعوس العصيدة نص الليل فوق الترعة معاها مجووك واخرين

[/size]

زاد الشجون كتب:: يا ابو عشرين ممكن اكون حدد هويتك بنسبة 65% من قعدة الكنار وانتظار بكاسي السوق دي ( الاخ من الذين سكنو داخلية المعيلق ... التحية لاهلها الطيبين) واكيد بتعرف ( كجك ) ( وعم بشارة ) و ( حسن الصول ) و ( وحاجة بت الكور ) الله يطراهم بالخير، آهـ ... زمن جميل ( ليت الماضي يعود يوما فاخبره بما فعل الاغتراب)

بس يا ابو عشرين ما تزيد ولا كلمة .... عرفتك .... والله يفغر ليك من رغيف الداخلية ( دايما تخش الصفرة اول زول) لما ت (تحرق) وتخم العيش لحدي ما تصل صفرتك و ( تقدها في الجماعة ) .... هاهاهاااااااااي Smile

** صفرة للناس الما عاشو داخلية : مكان تجمع الطلاب بالمعليق لتناول الوجبة الحكومية

زاد الشجون

بالمناسبة انا ما قريت في المعيلق عشان تعرفني

بس جيت قعدت فيها زيارة اسبوع فقط

وحينها كا ودبساطي طالب

كدي جرجر ودبساطي وقول ليهو الزاكم منو يمكن تعرف

والله انا ما قريت في المعيلق

الكاشف قال ( احتار انا احتار انا )
معقولة يا ابو عشرين اسبوع واحد يخليك تعرف بت الكور وعواسة العصيدة في ( ضهر الكنار) وانتظار البكاسي نهاية السوق Exclamation

بالمناسبة يا زاد الشجون بعد تدقيق وتمحيص وعصر للذاكرة استنتجت أمر خطير جدا جدا عن ابوعشرين
كتابة ابوعشرين وتعليقاته هذه لا يكتبها الا واحد فقط وليس غيره واحد يمكن يكون فى عداد الموتي ويمكن يكون حي ولو كان هو حاضبح عجلين وخروف لأنه كان زمان عزيز لي جدا جدا
ابوعشرين هو .. هو.. هو
هو
هو
هو
هو
هو
هو
؟
؟
؟
؟
؟

كمال الحاج حامد (ربنا يديه الصحة لو كان هو وربنا يغفر له لو كنت انا غلطان)

يا ادمن الكلام ده بالجد خطير وخطير جدا( انا جادي والله )
حتى انا غيبت رسمو من الخيال فالرجل غير الصداقة تربطنا بيهو ( لحمة ) ولحمة قوية جدا .... فارجو الانتباه .... ما كل ما يستنتج يقال يا ادمن .....انت عارف خبر زي ده لو وصل الحلة حيصل شنو ؟؟؟؟؟

زاد الشجون كتب:: يا ادمن الكلام ده بالجد خطير وخطير جدا( انا جادي والله )
حتى انا غيبت رسمو من الخيال فالرجل غير الصداقة تربطنا بيهو ( لحمة ) ولحمة قوية جدا .... فارجو الانتباه .... ما كل ما يستنتج يقال يا ادمن .....انت عارف خبر زي ده لو وصل الحلة حيصل شنو ؟؟؟؟؟

يا ابو الشباب كمال الحاج دا ربنا يرد غربتو لو كان حيا
ويرحمه لو كان ميتا
انا مش كمال الحاج ولو حاولت ان اكتب عنه هنا ما اوفيته حقه
زاد الشجون ما تمش بعيد
خلينا هنا

Admin كتب:: بالمناسبة يا زاد الشجون بعد تدقيق وتمحيص وعصر للذاكرة استنتجت أمر خطير جدا جدا عن ابوعشرين
كتابة ابوعشرين وتعليقاته هذه لا يكتبها الا واحد فقط وليس غيره واحد يمكن يكون فى عداد الموتي ويمكن يكون حي ولو كان هو حاضبح عجلين وخروف لأنه كان زمان عزيز لي جدا جدا
ابوعشرين هو .. هو.. هو
هو
هو
هو
هو
هو
هو
؟
؟
؟
؟
؟

كمال الحاج حامد (ربنا يديه الصحة لو كان هو وربنا يغفر له لو كنت انا غلطان)

ما تمش بيعد وتفكر اكثر من اللازم ولو دققت في الصورة دي جيدا بتعرفني وارجوك لو عرفت خليك كدي عشان ما تخرب الرصة

ياخي صورتك دي مرت عليها 30 سنة واكيد الآن الشيب اعتلى راسك ولسع بتتذكر الكنار والعصيدة وبت الكور انت اكيد كنت جاي هارب من حنتوب او من مدرسة الكاملين فى زيارة لأخونا المذكور سابقا وكنت عاوز جو هادئ للقراءة والمذاكرة فوجدت ضالتك فى المعليق ولقيت الصفرة الما خمج فتكلت

انا بطالب السيد المدير بتغيير اسم (ابعشرين ) الى اي اسم يليق بمكانة المنتدى مع اعتذاري لحامل اللقب

زرقاء اليمامة كتب:: انا بطالب السيد المدير بتغيير اسم (ابعشرين ) الى اي اسم يليق بمكانة المنتدى مع اعتذاري لحامل اللقب

اقتراحك خلي معاك
ابعشرين دا اتربينا منو
واتعلمنا منو
وهو حضارتنا
وثقافتنا
واكن ما عجبك ارحل من الجزيرة
ولكن اخشي ان لا تكون تعرف معني وقيمة ابعشرين

يا زرقاء اليمامة الاسم جميل جدا وياريت لو غيرتي اسمك وخليتيه ترعة او حواشة او سرابه

انا مصرة على طلبي يا ادمن وخلينا نعمل تصويت فى المنتدى على هذا الاقتراح انا متأكدة من اقتراحي سيكون اغلبية وعنده اختار له اسم بنفسي مثلا اسميه ... اسميه ... اسميه... ايوه لقيتها اسميه (بوبي)

(عذرا زرقاء اليمامة ) فبقدر اختلافي مع مواضيع ابو عشرين الجدلية الا انه له الحق في اختيار ما يروقه من الاسماء فابو عشرين اسم رمزي له دلالاته وهو يدخل في نفوسنا الطمانينة والبهجة وعليه(وعلى هذى السفوح المطمئنة نحن قاتلنا سنينا واقتتلنا نحن شكلنا التالف في انفعالات الاجنة ) وبه ولله الحمد (تعلمنا وتخرجنا واغتربنا) Smile

انا متاكدة يا زاد الشجون ان حامل هذا الاسم لا يعرف عن ابعشرين او الزراعة شيئ فواضح جدا ان هناك شخص يمده بالمعلومات هذه ما عدا صورته وهو صغير فهي تدل على انه اتصور بعد ما اخذ دش فى ابعشرين Mad

زرقاء اليمامة كتب:: انا مصرة على طلبي يا ادمن وخلينا نعمل تصويت فى المنتدى على هذا الاقتراح انا متأكدة من اقتراحي سيكون اغلبية وعنده اختار له اسم بنفسي مثلا اسميه ... اسميه ... اسميه... ايوه لقيتها اسميه (بوبي)

زرقاء اليمامة التي لا تستطيع ان تنظر تحت قدميها

من حقك ان تطلبي ومن حقك ان تصري علي طلبك

ومن حقي ان اسمي نفسي ما شاء
هل فهمت

وبوبي دا كلب ناس منو

زاد الشجون كتب:: (عذرا زرقاء اليمامة ) فبقدر اختلافي مع مواضيع ابو عشرين الجدلية الا انه له الحق في اختيار ما يروقه من الاسماء فابو عشرين اسم رمزي له دلالاته وهو يدخل في نفوسنا الطمانينة والبهجة وعليه(وعلى هذى السفوح المطمئنة نحن قاتلنا سنينا واقتتلنا نحن شكلنا التالف في انفعالات الاجنة ) وبه ولله الحمد (تعلمنا وتخرجنا واغتربنا)

احييييييييييييييك

Admin كتب:: ياخي صورتك دي مرت عليها 30 سنة واكيد الآن الشيب اعتلى راسك ولسع بتتذكر الكنار والعصيدة وبت الكور انت اكيد كنت جاي هارب من حنتوب او من مدرسة الكاملين فى زيارة لأخونا المذكور سابقا وكنت عاوز جو هادئ للقراءة والمذاكرة فوجدت ضالتك فى المعليق ولقيت الصفرة الما خمج فتكلت

يا ادمن الصورة دي حقت ولدي
وزمان اكان في صور وفي موبائل ما كان دا حالنا
لكن نقول الحمد لله

زرقاء ُ يا زرقاء
الريس قال الاسم جميل يعني لازم يكون جميل ، مافي كلام بعد الآدمن
يا ابعشرين غيرت المظهر عقبال تغيير الجوهر

وريها عليك الله

يا اخي دي ما عندها شغلة

هسي طلبك دا في زول واقف معاهو

كوركتي لمن صوتك راح في زول ردا عليك

زاد الشجون كتب:: زرقاء ُ يا زرقاء
الريس قال الاسم جميل يعني لازم يكون جميل ، مافي كلام بعد الآدمن
يا ابعشرين غيرت المظهر عقبال تغيير الجوهر