الرابطة و جيل التكنولوجيا

الاخ بساطى نحن رابطة (2006 ) يعنى انتهت الفترة الشرعيه بالنسبة لينا العام الماضى برضو كنا شغالين وبكل تفانى لانو اصلا لايوجد من يريد ان يستلم الرايه وللان شغالين والحمد لله الاخوة فى السريحة الان فى ترتيبات لاقامة الكورس الصيفى لكن لظروف مناخية يصعب فى الوقت الراهن (صيف مباااااااااااالغة) لانستطيع ان نوعدكم باى عمل هذه الايام
بعدين يااخوة دعونا نحتسى القهوة والشاى لاننا طولنا منها اصلو فترة التكليف كانت كبيرة اعتبروها (استراحة مقاتل) كفايه ثلاثة سنوات من التكليف الشاق والعسير يلا خلاص نشوف الجديد (والجديد شديد) زى ماقلت ليكم يعنى نحن فى انتظار جيل التكنولوجيا

يعني ادارة الرابطة بقت زي لبنان حتى الآن ما قادرين انتخبوا رئيس ولا شنو

Admin كتب:: يعني ادارة الرابطة بقت زي لبنان حتى الآن ما قادرين انتخبوا رئيس ولا شنو

اصلا المشكله فى الطلبة ما فى الرابطه
الرابطه ممكن يسلمو الرايه لكن لمن يرى فى نفسه الكفاءه وده بتطلب طبعا انعقاد جمعيه والجمعيه لازم الاعضاء او الحضور يكمل (النصاب ) وعشان يكتمل النصاب لازم يتفرغ الطالب وعشان يتفرغ لازم من اجازة وتكون اجازة كبيرة (وربنا يا ربنا تجيب المطر)
فى الاونه الاخيره كثرت الاجازات كل يومين عيد (شم النسيم / شم السموم / القيامه / وعيد الحمامة / والماشى البلد مع السلامة )لكن كلها لاتفى بالغرض لانها بحجم الكبسولة عندما تصل كبرى ازرق تلقاها انتهت (ماقالو اخر الزمن اى حاجة تبقى صغيره ) والاشنو

اجتماع للرابطة ما اظن يكون من سابع المستحيلات فالمعروف 90% من طلبة الجامعات يتواجدوا يوم الجمعة والسبت فممكن بكل بساطة الناس تجتمع ده لو فعلا عاوزة تجتمع او ممكن فى الخرطوم ممكن يجتوعوا في اي حديقة ويكونوا رابطتهم فالجدية فى الموضوع مهمة جدا

والله لو لقينا زيك عشرة بس يامنتصر

يا منتصر باشا لازم يكون للرابطة السابقة دور كبير ومهم فى هذا الموضوع... كن زمان عندما يحين تسليم الرابطة لجيل جديد يكون هناك خطاب دورة وميزانية ومناقشات كثيرة عن سير العمل فى المدة الماضية ثم بعد ذلك يتم تسليم الرابطة للجدد
اين انتم من هذا

ما قلن ليكم قبل كدة بتاعين شاي وموية باردة عملتو العجب

زرقاء اليمامة كتب:: ما قلن ليكم قبل كدة بتاعين شاي وموية باردة عملتو العجب

اولا شكرا لك زرقاء اليمامة على المرور والمتابعه كما اشكر عبرك الاخ بساطى ايضا وياهو ديل هم ابناء السريحه اينما اقامو وحلو همهم الاول والاخير (السريحه) وهذا ما التمسته منكم انتم عبر مروركم وتعليقاتكم وهذا ما سرنى وانا اراكم تتوشحون بثوب الغيرة على (السريحه)
فى الحقيقه يازرقاء اليمامة انا ما عارف ايه المزعلك من الموية البارده والشاى انتو زمان ماشربتوه والا شنو (للعلم ) ان موضوع الاكل والشراب كان ولازال من مالنا الخاص
ثم ثانيا موضوع تجديد الدماء للرابطه صراحة لم نعطه اهتمام كبير(لاسباب كتيرة)و لاننا كلنا فى النهاية فى خدمة البلد
نحن حاولنا ولكن حتى تتوفر الشرعيه الدستوريه (مسالة وقت ليس الا )
فعلا نريد دماء جديده بفكر وطرح وحماس واخلاص وانشاء الله اولادنا قدر المسئولية فقط (تنتهى الامتحانات ) ونوعدكم بتفجير كل الطاقات واستخراج كل مخزونات الفكر والثقافة
الانتماء للسريحه فخر والعمل من اجلها راحه
ونحن ............وانتم ...............وهم ........... عفوا .... كلنا ..... تعالو نتشرف بخدمة السسسسسسسسسسسسسسسسسسسسسسسسسسسسسسسسسريحه
ود عجيب

اقتباس :: نحن حاولنا ولكن حتى تتوفر الشرعيه الدستوريه (مسالة وقت ليس الا

)
حلووووووووووووووووووووووووووووووووووووووووووووووووووووة

لانه شراب الشاي والموية الباردة هو الذي افلس بخزينة الرابطة هل تعلم ان كل ميزانية الرابطة تذهب للرحلات والضيافة والمواصلات

زرقاء اليمامة كتب:: لانه شراب الشاي والموية الباردة هو الذي افلس بخزينة الرابطة هل تعلم ان كل ميزانية الرابطة تذهب للرحلات والضيافة والمواصلات

بالمناسبه انا ياود عجيب كان بينى وبينك فى خصام من زمن لكن الحمد لله انتهى واصبحنا قريبين من بعض والله انت كنت بترد بكل صدق فى موضوع الرابطة لانى كنت قريب من الاحداث لو بحثت فى ذاكرتك كويس ح تعرفنى وانا ما دايرك تعرفنى طبعا
اما بالنسبة لزرقاء اليمامه اقول ليها رحلات شنو يا انت وضيافه شنو ديل والله ايام الكورسات كانو بجيبو الشاى من البيت والواحد بكون شغال كل يوم حصتيناو تلاته وبالمجان كمان اسالو انور الطيب وهو مقيم بالسعوديه معاكم

كويس يا ود عجيب لقيت ليك محامي يدافع عنك بلاااااااااااااااااااااااااااااااااااااااااش

اقتباس :: اما بالنسبة لزرقاء اليمامه اقول ليها رحلات شنو يا انت وضيافه شنو ديل والله ايام الكورسات كانو بجيبو الشاى من البيت والواحد بكون شغال كل يوم حصتيناو تلاته وبالمجان كمان اسالو انور الطيب وهو مقيم بالسعوديه معاكم

طيب اكتر من كده عاوزين شنو يجيبوا ليكم صفرة وبيبسي حججم عائلي فكويس انتم لقيتوا هذا نحن كن بنشرب من الماسورة مويه طازه والشاي ما بنشوفوا الا من الاساتذه نفسهم ولكن الفرق الكبير ان كورساتكم كانت ضعيفة المستوى خاليه من روح المنافسه والشاهد على ذلك عددية المقبولين بالجامعات مقارنة بقرى اخرى مثل اللعوتة والتكينة فاذا عملنا مقارنة فنجد فعلا ان السريحة لا تخرج الا فى الكليات النظريه فقط اما الطب والهندسه والكليات التقنيه فاذا وجد فيها واحد من السريحه تجده درس بمدارس خاصه بالخرطوم ولنا اسوه باول السودان سابقا بكري على محمد عمر فهذا لو درس فى السريحة واخذ كورسات من رابطتكم لكان نسبته لم تتجاوز 70%
لكن ارجع للوراء وشوف الخريجيين ووكيف انهم اثبتوا جدارة فى جميع المواقع

الاخت زرقاء اليمامه نحن رابطه وعملها غالبا فى الاجازات (يعنى نحن ما مدرسه عشان تضعى كل الاخطاءعليها ( ده لو كان اصلا فى اخطاء ) لان الطالب اليوم بختلف عن طالب الامس بكثير ممكن تنظرى لمن هم حولك او اقرب قريب ليك وشوفى الفرق بينهم
اما بالنسبه للابن ابوبكر وفقه الله وسدد خطاه فانا احيه عبرك واتنمى ان ينضم الى هذا المنتدى ويتحفنا بارائه ومشاركاته الثره ابوبكر ماشاءالله كان طالب زكى واجتهد ولكل مجتهد نصيب
بغض النظر عن المدرسه
اما عن كورساتنا فهى لم تكن كذلك والدليل دفعه 2006 /2007 وارجو منك تتاكدى انا ليس لدى الوقت الكافى لاسجل لك قايمه الناجحين اما عن عدد طلابنا بالجامعات مقارنه بزمانك اكاد اجزم ان لامقارنه اصلا
وشكرا لك منى كل المنى

انت يازرقاء اليمامه عملتى شنو

الملثم كتب:: انت يازرقاء اليمامه عملتى شنو

عملت الما عملوه الرجال وامشي دور اسمي فى عظيمات السريحة ستجده مكتوب باحرف من ذهب ولكنه ملثم :D :D

يا جماعه المناكفات شنو المفروض الطرح يكون فيه فايده يعني نصيحه ،أقتراح مثلاً،،
مش عتاب و بس لا بفيد و لا بينفع،،

هشام السريحه كتب:: يا جماعه المناكفات شنو المفروض الطرح يكون فيه فايده يعني نصيحه ،أقتراح مثلاً،،
مش عتاب و بس لا بفيد و لا بينفع،،

كلامك صاح ياهشو مفترض نعمل وفى صمت حتى نرتقى بالسريحه بدل الكلام ومحاولة تنقيص الغير

اقتنعنا ....
بس البيقنع الديك منو
عارف قصة الديك ولا اخلي ( جدو) ابعشرين يحكيها ليك

زاد الشجون كتب:: اقتنعنا ....
بس البيقنع الديك منو
عارف قصة الديك ولا اخلي ( جدو) ابعشرين يحكيها ليك

انا ممكن أحكيها ليه رايك شنو؟

معقولة ؟؟؟
يلا ورينا شطارتك وان شاء الله ود عجيب يقتنع

يا شباب زرقاء اليمامه دي عملت دور كبير جدا ولو ما فاكرين اذكركم

كان عندنا اسبوع ثقافي فى مدرسة البنات الابتدائية وكان عملنا له حملة اعلامية ضخمة وقد تم افتتاحه من قبل رئيس اللجنة الشعبية بالسريحة أ0على حماد ومحافظ محافظة الكاملين انذاك وقد بأ بداية نشطة جدا كان رواده يزيدون كل ثانية وكان لانصار السنة جناح خاص مشاركين به وهناك اذاعة داخلية بقيادة محمد ابراهيم قدس ودكتورة سحر ابراهيم وهنا ظهرت المشكلة ... كانت صلاة المغرب قد بدات فى مسجد ابراهيم حمزة وفى تلك الاثناء دخل طفل الى الاذاعة وتلاعب بالمايك مما اصدر بعض الاغاني والاناشيد وحينها كان امام المسجد عباس النعمة وبعد انتهاء الصلاة قام وخطب فى المصلين خطبة عصماء وقال ان هولاء الشباب فاسدين ويبثوا الاغاني اثناء الصلاة وان الرابطة هى اثاث الفساد الاجتماعي فى الحلة ولولا تصدى له الاخ طه بابكر فى وقتها لكان هناك هجوم من كل المصلين ليدمروا هذا الانجاز وكان وراء ذلك امراءة عملت فتنه حتى الآن لم نعرفها وهي التي ابلغت عباس النعمة باشياء غير صحيحة موجودة فى هذا التجمع؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

كذلك فى ختام الاسبوع الثقافي كان هناك منسق الدفاع الشعبي والخدمة الوطنية بمحافظة الكاملين وكان جمع غفير وكانت ضربة البداية بقرىن وتبعتها اناشيد دينية واذ نفاجأ بقوة طلاائع الجهاد بقيادة المجاهد فقاد يوسف طلعنا نشوف الحاصل وجدنهام عاملين خطوات تنظيم امام البوابة ومنتظرين اشارة لاقتحام البوابة واحتلال المدرسة ولولا تدخل المنسق العام للدفاع الشعبي وكان حينها الاخ الدخري لكان هناك دماءواشلاء لم تحصل من قبل..... من اوعز لفقاد وقواته ليتصرفوا هذا التصرق واحدة مكن اخوات مهيرة من هي؟؟؟؟؟؟؟؟؟؟؟؟؟؟

اكيد وجدتم الاجابة بين السطور

اود ان اصححك الاخ الادمن ان هذه الاحداث حدثت فى عهد قريب وكنت موجود لكنى لم اكن من المنظمين اكيد طبعا لان التنظيم لم يكن بالمستوى
ثانيا اوكد لك انك تقصد زرقاء وانا ادحض هذا الافتراء لان ساعتها زرقاء اليمامه كبييييييرة واكيد تكون عقلت وما اظنها تفعل ذالك والاشنو

اسمحو لي ان ارد على الجزء الثاني (محاولة اقتحام قوات فقد يوسف للمدرسة)
انا كنت قاسم مشترك بين الرابطة واسبوعها الثقافي و قوات الدفاع الشعبي في تلك الفترة
كل ما في الامر ان احد اعضاء الرابطة ( بدون ذكر اسماء ) ارغى وازبد وارعد وشتم وقدح في قوات الدفاع الشعبي والقائمين على امره والمتدربين ، وقال ما لم يقله مالك في الخمر
فكان لابد من توجيه رسالة مفادها ( كما للرابطة رسالة تؤديها للدفاع الشعبي ايضا رسالة يوديها ) لا سيما وهو يضم مجموعة من رموز الحلة وقتها (معسكر الشهيد وداعة الله بالسريحة) امثال على حماد وعبد الباقي شوية وهجو السيد واخرون لا تحضرني اسمائهم فالامر لم يتعدى الاناشيد والجلالات الجهادية امام المدرسة فكما اسلفت كان المعسكر يضم نخبة مستنيرة تنا بنفسها عن الافعال الصبيانية وردة الفعل نابعة من قناعاتهم لا من تحريض امراة فهم اكبر من ذلك
عبر المنتدى ارفع تمام سلام للاخ فقاد وللاخوة دفعة الشهيد وداعة الله بالسريحة

ياخى معسكركم ده كان فوره ساى سرعان ما انطفى ولا اظن ان له فايده تذكر