الاغتراب عن الوطن

ا منذ زمن بعيد بدا الناس فى الهجره عن الوطن وذلك لتحسين احوالهم المادية لان الاحوال فى البلد كانت سيئه لايمكن ان تلبى حاجات ومتطلبات الفرد منا............
ولكن الاحوال والحمد لله بداءت تتحسن مايكفى لتامين حيا ة مقبولة...............
احب ان اوجه سوال للاخوة المغتربين ..........هل الاغتراب يقلل من شعور النتماء للوطن .
.....واقول لماذا الاغتراب .........لا تقول لى لتحسين اوضاعنا المالية....اقول لكم تعالوا واعملوا بجدية ولمدة 12 او 13 ساعة كما تفعلون هنالك فسوف تصبحون كما تريدون فالجديه فى العمل هى اساس النجاح.
فابتعاد الفرد عن اهله واصحابه وجيرانه ليس بالمسا لة السهله ..........اقول لكم ارجعو الى اهلكم واحبائكم ..يا اصدقائى لن نعيش اكثر من حياه واحده...ولا رايكم شنو

الأخت الفاضلة / سمراء

الموضوع مهم ، لا شك في ذلك ،،، لكن له أوجه كثيرة ، و نقاط عديدة يجب أن تطرح على طاولة البحث ، و موضوع مثل موضوع الإغتراب جدير بالإهتمام و يحتاج إلى مداخلات من الإخوة و الأخوات داخل و خارج السودان من أعضاء المنتدى و زوار المنتدى ،

أختي الكريمة .... لقـد سلطتي الضوء على أمر هام ، أرجو أن يجد التجاوب و النقاش و الحوار الهادف من الجميع ،،، لك تحياتي .

أخوك / الهـدهـد

الاخت سمراء بعد التحية والاحترام
بالنسبة للوقت الراهن نعم كلامك صحيح انو السودان بداء ينتعش اقتصادياً والاحوال بدات احسن من الاول لكن اجزم انها لا تلبي احتياجات الفرد لماذا هناك فرق في المعيشة واضح وبصراحة هناك غلاء في السودان وصرف زايد عن الحد ولو بتصرف ملايين ستجده في نهاية الامر انك اصبحت مديون اي انه لا يوجد توفير بعكس الغربة لوانك بتصرف ملالين ستجد انك في نهاية الشهر انك قد وفرت مبلغاً معين بعد صرف ما يلزم وارسال احتياجات الاهل.

مسألة الاغتراب يقلل من شعور النتماء للوطن .
فبلطبع لا ولا لأن الوطن عايش في وجداننا من الداخل منقوش بأحرف من نور يستحيل محوها وازالتها مهما تراكمت السنين .

لماذا الاغتراب سؤال محير بالجد لكن متعارف عليه انه تحسين الحالة المادية وتغيير نمط الحياه ورتمها من نمط معين الى اخر ورؤية المستغبل في منظور أقرب.

بس تكلفة الغربة في نفس الوقت غالية وكبيرة .
واهمها سرقت شباب الفرد و الابتعاد عن الاهل والاحباب أكبر مشكلة وفقدان أعزاء وانت في الغربة شئ صعب على الكل .

خلاصة القول الغربة مرة ومؤلمة بالرغم من حلاوة طعمها في أشياء اخرى
والله المستعان في كل شئ

الاخت سمراء المحترمة
قديما قيل
ثلاث يعز الصبر عند حلولها ويذهبن عقل اللبيب
خروج اضطرار من بلاد تحبها وفقد صديق وفراق حبيب
فالهجرة خارج احضان الوطن شيئ مؤلم جدا وهم كبير جدا وفوق هذا منتظرك مجهول لاا يعلم به الا الله ،،، العمل - الكفيل - قوانين البلد - الضرائب - مشاكل الاهل التي خلفتها وراك- كل هذه تحملها معك ذهنك وواضع نصب اعينك اهداف اخرى ،، ولكن لما تصطدم بالواقع المرير تفكر مرارا وتكرارا بالرجوع الى احضان الوطن ولكن تجد الزمن قد مضى وتحت هذه خالضغوط تعمل وتعمل وتعمل والهموم فى تزايد مضطرد
فكيف لشخص مثل هذا ان يفكر بالرجوع بسهولة لو ما حقق اهدافه التي يصبو لها
اما السودان ففعلا هناك انعاش اقتصادي ولكن ليس بالصورة التي تجعل امر العودة سهل وتوفير وظائف لكل الراجعين فلسع السودان عاوز فترة كبيرة حتى يستوعب اعداد المهاجرين فى الدول العربية والغربية ونتمنى ان يحصل هذا فى اقرب وقت ممكن
سؤالي لك : لو تم ارتباطك بشخص مغترب هل تفضلين الاقامة معه فى بلد عمله ام سوف تصرين عليه بأن يرجع السودان مهما كلف الامر؟

لك التحيه يا الهدهد ايها العضو النشط

الاخ ابو جاسم لك التحيه
والله يا ابوجاسم اقول ليك ان المعيشه عندنا معقوله وهى عيشه اتعودنا عليها وبنمارس حياتنا بصوره طبيعيه بس انتو لمن ترجعو فى اجازه بتشوفو العيشه صعبه شويه لانكم بقيتو متعودين على نمط معين ....بس الحكايه عايزه صبر واراده وعزيمه ..... واقول لك انو عندنا كثير من الناس كونو حياتهم وابتدئو من الصفر والان مشاء الله عليهم من الاغنياء وذلك من دون هجره ولا اغتراب من الاهل والاعزاء
اسالك سوال ..شعورك شنو لمن تلقى طفلك قد عدى مرحلة طفولته وانت بعيد عنو وهى دى اجمل مرحله فى العمر ....ولمن ترجع وتكون فقدته اعز انسان لديك

اخى ابو ناجى لك التحيه
اقول لك لو ان كل زول بقول انا برجع السودان بعد ما اعمل كذا وكذا ولمن يعمل تظهر تانى متطلبات اخرى ..اى الحياه فى تجدد مستمر ...فيضل الزول متغرب فى ناس تصل معاهم 20 سنه وناس 30 سنه ...عليك الله بعد ذلك بقى فى العمر بقيه
اما انا اكان ارتبطه بى واحد مغترب بصر عليه ارجع علشان نبنى حياتنا مع بعض مهما كانت قسوة الحياة

سمراء كتب:: اما انا اكان ارتبطه بى واحد مغترب بصر عليه ارجع علشان نبنى حياتنا مع بعض مهما كانت قسوة الحياة

والله كلامك حلو جدا وأنا خايف يكون شعارات بس ، عشان أنا أعرف بعض النساء هن السبب الأول والأخير في اغتراب المغتربين وبي السنين الطويلة لأنهن تعودن على نمط معين من الحياة ، وهي كل يوم تبني وتكسر وتجيب في الأثاث والفرش والراجل شقيان بي جاي .
على العموم لو دا فهمك في الحياة يكون سعيد من تكوني من نصيبو .
أنا داخل لي على موضوع خطوبة الأيام دي ، ولو الموضوع دا طرشق تكوني إنت البديل .
رايك شنو ؟
موافقة ؟
عشان نجي نتلم على أهلنا .

اخي ريال مدريد لك التحيه وشكرا للمداخله الحلوه دي
والله والله الكلام دا ماشعارات ودا رائي بصراحه فى الاغتراب .........وربنا اتم ليك موضوع خطوبتك دى على خير ..علشان ناندا ما تقول عايزه اخطفك منها
تعال هنا انت تقول لى بديله وما بديله وعايزنى اوافق..........

سمراء كتب:: تعال هنا انت تقول لى بديله وما بديله وعايزنى اوافق..........

نعم أنا قلت ليك بديلة ما قلت ليك ضرة !
وأنا أديت كلمة والناس عارفة كدا وما برجع في كلمتي .

انت يا ريال داير تكوش على كل بنات المنتدى
ياخي ادي الفرصة لغيرك وركز فى واحدة وتابع المثل البقول "صاحب بالين كداب"

في التخطيط السليم لازم تتوقع كل الاحتمالات وتكون عندك الخطط البديلة .

ريال مدريد كتب:: في التخطيط السليم لازم تتوقع كل الاحتمالات وتكون عندك الخطط البديلة .

يا زول انت داير تحرر غزة ولا شنو؟؟

السلام عليك آآختى ،،،موضوعك بالحيييل بووجعنا أصلنا نحن موجوعين آآختى نسوى شنو؟! كتبت علينا خطاً ومن كتبت عليه خطاً مشاها ... ودى أقدارنا والواحد آآختى ما معروفه لقمة عيشو وين ... والله مابندور التلتلة والشلهتة فى بلدان الناس والنوم والصحيان بالهم ، أنا غايتو واحد من الناس لمن إجازتى يكون باقى ليها 20 يوم وأرجع تانى للغربة ... نومى ببقى خزاز والكوابيس بتكتر .. الله يحلنا من الغربة ونسأل الله يرجعنا سالمين غانمين.

الاخت سمر متعك الله بالصحة
صراحة شعور لا يوصف يختلط في طياته بالاسى المرير في فقدان اعزاء لم ترهم من سنين وها انت اليوم لم ولن تراهم ابداً اكيد موقف صعب جداً وبالنسبة للأطفال ايظاً برغم انو ما عندي لسه حديث زواج أيضاً صعب جداً .
بس انتي يا سمراء أسالك سؤال ممكن .
1 / لو ما الغربة والناس البغتربو هل حيكون هناك مجال يتسع لكمية الطيور المهاجرة دي بالنسبة للعمل والوظائف ولا حايزيد كمية العطال الموجود في البلد ؟
2/ لماذا يفضل الناس الاغتراب ؟
3 / سلبيات الاغتراب وايجابياته ؟
4 / الحنين للوطن هل هو حقيقي أم مقولة زائفه ؟
5 / هل يقتنع من في البلد بالعيش اليسير في ظل وجود فرصة اغتراب مغرية ؟

وممكن للجميع المشاركة

وتقبلي فائق احترامي

اشكرك اخى العجب على هذه المداخلة الرائعة

الاخ الكريم ابو جاسم لك التحية اولا اشكر ك على هذه المداخلة الحلوه
ابو جاسم كتب
بس انتي يا سمراء أسالك سؤال ممكن .
1 / لو ما الغربة والناس البغتربو هل حيكون هناك مجال يتسع لكمية الطيور المهاجرة دي بالنسبة للعمل والوظائف ولا حايزيد كمية العطال الموجود في البلد ؟
2/ لماذا يفضل الناس الاغتراب ؟
3 / سلبيات الاغتراب وايجابياته ؟
4 / الحنين للوطن هل هو حقيقي أم مقولة زائفه ؟
5 / هل يقتنع من في البلد بالعيش اليسير في ظل وجود فرصة اغتراب مغرية ؟
سوف اجاوب على اسئلتك حسب رائى الشخصى وكل منا له وجهة نظر
1- اقول لك اخى ابو جاسم ان السودان يسع الجميع بس اذا كان فى عزيمه واصرار
2- يفضل الناس الاغتراب ....لان الحياه سهله وهنالك كثير من المغريات
3- سلبياته انك بعيد عن الاهل والاحباب والاعزاء والاصدقاء اما ايجابياته .............
4- والله حقيقى 100%
5-اذا كان فى عزم واصرار على تحقيق طموحاتى وتحين الوضع فى بلدي احسن مليون مره من خارجه ولو كان حينصبونى وزير
احب ان اساْلك سوال ؟ الم تجرب الاحساس عند وصولك مطار الخرطوم وانت على اول درج فى سلم الطائره وانت نازل عندما تستنشق اول نسيم ...........ولك الشكر