اعتذار ... من الشاعر عبدالبديع لكل الاهل

الاخ عبد البديع بابكر الامين بعد قصيدته التى داعب بها قرانا الحبيبة و اوضحنا فى هذا المنتدى اعتذاره للاهل و الاحباب الا انه اتصل بى ليخبرنى بأنه نظم قصيدة اعتذار لكل من اساء الفهم لقصيدته السابقة و فيما يلى نص الاعتذار :

يا لسانى جر القافية و ميز قولى و اشعارى
مانى قاصد اجرح اهلى و ابقى حضارى
كنت بشاغل و اداعب شايل الحب للضهارى
و انا بتنسم هواكم و الجزيرة الخدرة دارى

انتو يا اهل المودة بيوتكم بالكرم حافلات
تلوب الحارة اهل الواجبة دون افلات
سيوف الصاقعة اخوان المها الجافلات
اقبلو اعتذارى و اللوم بجى بالغفلات

العديد بداية عقدا فى جيد الحسان لماع
اصحاب علم حازوا الفضيلة بالاجماع
يا اسياد القدح السيدو ما قال جاع
اسف للاساءة كان بكت ام براع

يا ود لميدسلام يا اهلى البسترو الصادى
رمز المحبة امل النظارة و الامجاد
يا قشاشين دموع امات قرينا نادى
طبعنا الفى التكينة كلو فوق الوادى

معليش يا النابتى ام الجمال الفره
كلامى القلتو فيكن انا منو بتبره
الجود و الكرم مارقين قدحكن بره
بتحمو الوطيس فوق ضهر الجواد ابغره

بركات عزيزة مافى زول مساها
من زمنا بعيد سيرة الفضل حارساها
يا جيابين رضوة المهرة المبلم فاها
الشافع الصغير اصلو السكة ما بخطاها

ان داير الكرم و العزة البتنزل صاقعة
انزل ازرق شمس الضهارى الفاقعة
اهل مروة و فراسة ما متراجعة
فيهن اسود معروفين بسندو الواقعة

السريحة جوهرة فى الجزيرة فريدة
اكتر بلد بعد التكينة بريده
بلد ام رشوم المفدعة ايده
اخت الفنجرى المزين جيده

اتلومت من اللوم لبست طيقان
شبعت ندم غطى الترعة و البرقان
يا من رفعت سماك و انزلت للقران
تزيد الناس مودة عمارة للفرقان

ابداع يا عبد البديع وربنا يحفظك .
قصيدة جميلة جدا وفيها من الصفات الحميدة ما يدل على إنك ملكت ناصية الشعر .
وأنا من الأول كان موقفي واضح تجاه القصيدة الأولى واعتبرتها مزحة منك .
اعتذارك مقبول وقلوبنا صافية ومسامحة وما في عوجة تب .
وأعجبني جدا المربع بتاع السريحة .
الله يديك الصحة والعافية يا مبدع .

كل الشكر ل شاعرنا عبدالبديع ودا المطلوب من اولادنا عشان الود يستمر بين النا س ولانسا دور الاستاذ انور التكينه في معالجت الموضوع فله منا جزيل الشكر

شكرا يا عبد البديع على هذا الاعتذار الكبير من شاعر كبير ونتمنى لك كل التوفيق والنجاح فى المجال الشعري
كما ندعوك للتعاون مع الفنان سيف السريحة وتكونوا ثنائي شاعر وفنان،،،،،،،،،،، والى الامام مزيدا من التقدم والازدهار
شكرا استاذا انور على متابعة الموضوع

الى المبدعين :
* خالدة الامين تنير
* توفيق خالد

عبد البديع اعتذر ووضح لحسن النية
وين ردك عليهو يا خالدة ردى تحية
و يا توفيق خالد بى كلماتك الوردية
عمقوا للصلات بى روح جميلة ندية

انور

اخر صورة لعبد البديع
[url="http://www.merkaz.net/up/111198.html"] اعتذار ... من الشاعر عبدالبديع لكل الاهل 111198

اعتذار ... من الشاعر عبدالبديع لكل الاهل 111198

[/url]

مشكورين أخونا الشاعر / عبد البديع بابكر الامين
على هذا الثنى الشعري الرائع والتي جسد فيها
روح الاصالة بين أبناء المنطقة الواحدة .
تحية طيبة للاخ انوالتكينة على هذا المعالجة
الطيبة التي ان صح لي التعبير فهي تاتي في
صياغ لم شمل اهل المنطقة بالخير .

والله سامحناك يا عبد البديع ، ورضينا منك إلي الغاية ، بس ما شاء الله صورتك أجمل من الإعتذار ، عيني باااااردة!

الا تلاحظون يا شباب ان صورة عبد البديع دي غير واقعية
كيف لشخص يحمل طورية وفى الحواشة وفى تقنة العيش يكون نظيف كدة ووجه يلمع وجلابيته بيضاء ومكوية كأنه ماشي لحفلة
الظاهر عليك يا عبد البديع مرطب آخر ترطيبة والكدنكة دي ما خايلة فيك تب

وأزيدك من الشعر بيت :
الصورة دي صورها براهو ، يعني ما في زول صورو .
بس مسك الجوال حقو ( أبو كاميرا ) وصور رقبتو .
بس الشهادة لله ( عيني باردة ) لعبد البديع وللعيش .
وبعدين العيش دا مفروض بعد دا يدقوهو ، يعني المفروض يكون شايل ليهو مدقاق بدل الكدنكة دي .
معقول يكون ماسك ليهو موية وللا يحش في العيش بعد ما نجض ؟

، يعنى يا الادمن و الريال انصرفتو عن القصيدة و جوهر الاعتذار ، لى صورة عبد البديع و جلابيته .
المشكلة شنو ؟؟ كان ماسك موية فى القمح و لما لبس جلابيتو راجع... مر بجوار العيش... صور نفسو بالموبايل طيب ..
يلا ورونا تعليقكم على القصيدة .