مقال ساخر ... منقول

مقال ساخر ، منقول من جريدة الرأي لعام السودانية .

كونفوشيوس سودانى

قبل أكثر من 2500 عام استدعى الفيلسوف الصيني العظيم (كونفوشيوس) أحد تلامذته الذى قضى معه سنين طويلة ينهل من علمه ليعرف ما إذا كان هذا التلميذ قد إستفاد من حكمته أم لا ولما وقف التلميذ بين يديه قام بسؤاله :

- قل لي ماذا تفعل إن ضربك أحدهم

- أشكره

- لماذا

- لأنه لم يضربني بعصا

- وإن ضربك بعصا ؟

- أشكره … لأنه لم يضربني بالسيف

- و إن ضربك بالسيف؟

- أشكره لأنه لم يقتلني

و هنا أدرك الحكيم أن الشاب قد تعلم ..

لا أعتقد أننا كشعب نعرف كونفوشيوس جيدا (هو أنحنا فاضين) ، لكن يبدو أننا لحكمة يعلمها الله نسير على ذات النهج (الكونفوشيوسى) لدرجه أننى بدأت اشك فى أن لهذا (الكونفوشيوس) جذور (سودانية) فكل الاشياء عندنا (جميلة) وعال العال لأنو من الممكن أن يحدث أسوأ منها !!

وفى رأيي المتواضع أن هذه (الثقافة السلوكية) لها (القدح المعلى) فى تسجيلنا كأمة لأدنى معدلات النهضة والرقى وذلك لتعامينا عن قصد عما يحدث لنا واضعين (حيزاً معتبراً) لفعل (أسوأ) لم يحدث - واهمين أنفسنا بأنه كان من الممكن أن يحدث!! ومن هنا جاءت تلك الأمثال والأقوال (المهببه) التى قامت بتأطير هذه المسألة (الجاتك فى مالك سامحتك) و (قدر اخف من قدر) والحاجات (الزي دي) !!

(1)

- بالله بس معقول (البنزين ) ده يكون غالى كده ونحنا بنصدرو؟

- ياخى أحمد الله إنو هو متوفر وموجود !!

(2)

- عليك الله دي طريقة؟ الماهية تخلص من يوم خمسة فى الشهر؟

- مش كويس الما بتقطع من يوم 2 فى الشهر !!

(3)

- معقولة بس تتغلبوا صفر / 2؟

- مش كويس ما أدونا (دستة) !!

(4)

- ما مشيت لى (عباس) قالوا وقع كسر إيدو وراسو (إتظلط) !

- جات سليمة الحمدلله الما كسر (حوضو) وإلا (مخروقتو) !

(5)

- أها والحرامى سرق منكم شنو يا عيشة؟

- والله ما خلى لينا حاجة .. لقط الملايات والمفارش والتياب وهدوم الأولاد والرسيفر والتلفزيون !

- والدهب نعل ما شالو؟

- بس فضلت ليا الغويشة اللابساها فى إيدى دى !

- أحمدى الله الما شالا كمان !

(6)

- والحفلات عندكم بتنتهى الساعة كم؟

- والله محددنها لينا تنتهى الساعة (حداشر) !

- جميل والله كان ممكن يقولو ليكم الساعة (تسعة) !

(7)

- والورم الفى بطنو ده طلع من شنو؟

- تتخيل اتضح إنو الدكتور نسى ليهو (شاش) فى بطنو !

- ياخى جات سليمة كان ممكن ينسى الموبايل بتاعو !

(

- وإن شاء الله تكون يا (عمران) عرستا ؟

- والله لسة يا حمزة

- يا زول أحسن ليكا هسه تجيب ليكا مرا (تسل) روحك !!

(9)

- تتصور إنو فى شركات حكومية رايحة وما لاقينها وما عارفين ليها عنوان؟

- يا خى مش برضو كويس إنو فى شركات لقوها وعارفين العناوين بتاعتا !

- (10)

- الوالد إن شاء الله خرجتوهو من المستشفى؟

- تعيش إنت الوالد إتوفى أول أمبارح !

- والله أحسن ليهو من الحياة (النكد) دي!!

كسرة :

وأنا أكتب هذا المقال على (اللابتوب) نسبة لإنقطاع الكهرباء من (الصباح) إذا بالكهرباء (تجى) فتهتف حرمنا المصون :

- الحمدلله الكهرباء جات والله كان ممكن لحدت بكرة ما يجيبوها!!
+++++++++++++++++++++++++++++++++++++++++++++

مقال ساخر ، منقول من جريدة الرأي العام السودانية ، العدد رقم : 22593 الأحد 15/2/2009 م
للكاتب / الفاتح جبرا .

توقع الاسوأ بالمناسبة حاجة كويسة للسودانيين وهي تبرهن مدى قوة ايمانهم بالقضاء والقدر والتسليم لامر الله
ولكن الشيئ اذا فات حدو انلقب ضده فلابد من وقفة كبيرة لكل هذه المتغيرات وخصوصا عملية نسيان الشاش فى بطن المريض التي تكررت مرارا وتكرارا وليس هناك رادع لهولاء الاطباء المهملين ولو واحد بس اشتكى ولقى الجاني جزاهو ما كان حصل دا

الأخ العزيز / أبو ناجي

في رأي المتواضع ، المقال لا يخرج عن نقطتين :

• الأولى : لا أدري هـل يريد كاتب المقال أن يمدح الشعب السوداني و يقول عنه : شعب طيب و مسامح ؟؟؟

• الثانية : لا أدري هـل يريد كاتب المقال أن يذم الشعب السوداني و يقول عنه : شعب ساذج و بسيط ، يأخذ الأمور بسطحية ؟؟؟

الراجح عندي ، أن الكاتب أراد أن يقول : ........

أترك التعليق للإخوة و الأخوات أعضاء و زوار المنتدى .