كلام في الممنوع 2

مجنونة ليه
عشان قالت بحلم بمترو وجيه
وانفاق تودي لبحور شوق وامواج حنين وقاع مليان حوريات
وجبال مرجان واعشاب زهر واحلام وودبيت اغنيه
عشان عمري الانسرق في مدرجات مليان تاريخ مغشوش
ولوحات مجاديف ووابورات تحلم بالخريف
عشان النهضة الزراعية
تبقي شامخة وترعنا مليان مويه
عشان القطن يبقي ابيض زي جلاليبنا الزمان
ما ملون ومعكر زي الوان جديدة ما هي الوان
وزي زمان ماهو الزمان
عشان البلد تتورد وجنتيه
وتنبت الف زهرة وتلد الف بقرة وتمرح الف نعجة في سواقيه
مجنونة عشان قالت انا بحلم وبرسم
مزارع قمح سنابلها زي حراب
نحارب بيها الجوع ونتلقي بيها سنينا عجاف
بحلم بمطر غزير وشديد
وبرد وثلج وضباب وشارع نضيف
وبخضرة وبسدر مليان رخا
ما دايرة اشوف ايادي بدمانا ملطخة
ما طاهرة وشائلة مصحف ومسبحة
ناس جيوبها منفخة
بعرق الغبش وحق الناس الفي الشمس متوحوحة
ناس بيغسلهم المطر وببركاتو عيونهم مفتحة
ناس ضلهم العصر لا تلاجة لا مروحة
ناس كاتلهم الهم غير العري مافي استحا
جباههم بالغرة موشحة
ناس يشتهوك اشتها
وناس يزجوك في سجون او يرموك في مشرحة
بلد ساقيهو النيل
وكحل بالفرح عينيه
ليه محزون هو
وليه فقير ووليييه مشدوه
يا سكان القمر الفوقنا
يا احلام البرج الفاتح شوقنا
نشوف الثمرة اليانعة
وتبلع عنب الجنة حلوقنا
نحلم وما نحلم بقطر طائر فوقنا
وبطائر راكي فارد جنحاتو يناجي قلوبنا
يبشرنا بان الصحون الطائرة دروعنا
وقمرنا الحائم شبك شمالنا بجنوبنا
عشان تتشابي علومنا
وتطلع الافة من جيوبنا ونزكي زكاتنا ونطفي حروبنا

مجنونة وما مجنونة
دايرة التاريخ يبقي رسمة شفافة لونها

يكتب زي ما يكتب بس يبقي كربون او كاميرا تلقط الشافتو عيونا
مجنونة ليه
عشان قالت بحلم بمترو تحت الارض
وبمستشفي في كل بلد
وبكهرباء تدور مصانع الترك بلا كبد
وطن خير ووطن رغد
مطر سقاهو بركات الدنيا
ومالو تكون مجنونة
لما تنصرنا بتاريخ نضيف
ولما حيط الاستاد الجديد تقيف
ولما البيشربو البنزين ياكلو رغيف
ولما البرادو ما تكون صرعة لحفنة من الناس وبس
ولما سجون سوبا تستقبلهم وعلي عماراتهم ندق الجرس
ولما قنطار القطن للمزارع يساوي عدس
ولما النيل في ترحالو يقبل ارض الجرف
وما تبقي مزارع للدعارة وللانحرف
هي ما قالت كلام عن خرف
هي فاض بيها
هي مهزومة وهي محزونة وهي مكلومة وهي فلت من جواها الحرف
ثلاثون عام يا جماعة
كتبت علي الصخر كتبت فوق السما ما تراعو الظرف
ما تخلوها تحلم وخلونا كمان نتقن اللعبة ونحترف
نبقي مريخ او هلال زي النجف
ونغني يا عجب يا تعب
ان شاء الله نبقي وردي
ونردد حنبنيهو البنحلم بيهو يوماتي
الرباط مصلوبة حتي الان
9 مليون دولار معدات معامل
مدفونة ومحنطة في مقبرة الفراعنة المليون
عشان يشوفوها ناسنا البيدفعو للطب 14 مليون
ولدرء الكوارث 7 مليون
وعشان المحزونين وما لاقين ما يتعلموا
ما يشموا البنزين
عشان يموتوا لانو المقابر فاضية
والجنوب بقي ما زي زمان بيتناقص
بقي يتمدد زولهم بقي مهند
مسلسل تركي
وعندو جوال باسمو
سجم خشمو
اتشلق المارد الاسود
حكمة الله العربات كلها اتظللت بقت غابات ابنوس
والنظارات ذاتها بقت سود
قالو ليهم ابنو اسواق ابنو كباري اعملوا مليون معهد
في جنوب الوادي البترول بقي عدد
قلنا ليهو دايرين كلو زول يتعلم وينهض
لكن الجماعة غشوه ان ذاك خطر وانت ان فعلت مهدد
باقتسام السلطة والثروة والمال والولد
فخير لك ان يظل الجهل يتمدد
وان تعمل مليون ماقدونالدس
والاسناكس وااهوت دوقس
وعلب الكولا ختوها زينة علي قطاطي الشلك
احزان الناس بتبقي فرح
خليهم من البترول الاتفجر
خلوهم يشوفونا زي ناس جيمس بوند
وهم زي ما هم يفتحو خشومهم في كمد
اللعبة يا زولي استوفت
فلنفتح ملف الحزن القابع في الغرب
ولتنتفض دارفور وثبة تريد لها نصيبا من خزائن الارض
هي ما حقتهم براهم هي حقت من سكن الارض
هي ما ثروتهم براهم هي للشرق والغرب
للجزيرة يا مدني صلبوك في ادب
السماد واليوريا في البنك الزراعي تجارة مرهونة لناس كروشهم كبيرة
وممنوع أي تمويل الا بورقة من بورصة الانقاذ
ومن ينقذ غير الرب
مجنونة وليها ما تجن
حزن الوطن وجع الوطن ومن يغني للوطن
كان وردي وابو الامين وعثمان حسين
اما الان فكثر و ما فاهمين
وغضب الامة اتمدد نار
والشارع ثار
والمجنونة بتقول وين الشعب
وين الملايين
الصمت القابع ليهو سنين
خلاها تقول دايرين مستعمرين
ومستثمرين مستعمرين علي الاقل ديلك حنينين
وعيونهم خضر وسمحين
وديل افعالهم ما افعال زول عندو دين
ياخي شوف السجون
فيها المساكين
واحد قالو مات وعلي رقبتو 135 مليار
ماهو زول مسجون ولا مضايق وممكون
كان حائم بلاند كروزر بدوس الارض والطين
وبيدوس المساكين
وعندو عقار
وعقار يسوي شارع السريحة
وداير يدخل في تسوية
يعمل قبرو من كونكريت ويوصلو ليهو تكييف
عشان يفتدي بروحو
من حر الطاقة المفتوحة من جهنم
ان عذاب ربك لشديد
ونؤمن بان ذلك ليس ببعيد
لكل مرابي وعنيد
بان سمع ايات الله تتلي وهو في غيه المعهود
مالو ما تجن وخلوها التجن ومنو فينا الشديد
هي ما نبذت الشعب هي بتحرك مواجع القلب
انتو ما طلابها وانتو ما اولادها وانتو البذرة القامت دابها
بتنور فيكم وبقول ليكم كان ما غيرتو الحال وحققتو القلتو ليكم فالمستعمر راجيكم
غريبة ناسنا ما بخافوا من الله جل جلاله
لكن بيخافو من النظام العالمي الجديد
وكل ما باك مون يتحرك ترتجف قلوب وتقيف قلوب
وكل ما امريكي ماشي لنيروبي او حتي حط طيارتو في جوبا من غير استئذان
والله يا جنوب بقيت بعبع
ويا دارفور ليك زول منفوخ اسمو عبدالواحد اقل ما يوصف بيهو انو زول سمج ودمو تقيل
لكن عامل بعبع
بعبع في بعبع
ونحن ننبلع
والله وجع
فلتكن مجنونة
ثورة الشعب في باطن الارض مدفونة
وبتطلع ليهم زي بركان تدمر سجونها
القهر هتك متاريس اتزانها وحصونها
عمر الدكتورة ضاع المسكينة
وعاشت كلماتها المليانة الرصينة
فلنقل انها مجنونة
لكن ده الشافتو عيونها

][/font]

يا لها من روعة يا الطيب كتاباتك الرمزية التي حللت الموضوع فى قالب شعري قوي جدا
كلماتك هذه ذكرتني بكلمات حميد:
يا مضغوط خفف مرتك توب مضغوط
خفف ميزك حبت تين تنك القعدة 3 خطوط
خفف مرتك توب مضغوط من التمسحبو كبابي الصين
خفف عمرك يا ابن الفانية وبنظارتك واجه ثانية
ثانية عموم الشغالين
ثانية وبس
والله مهازل
والله عمايل
عامل ساكن فى اخر الدنيا
ينتج كيف شغال بفونيا
عامل ينتج 20 حتة
ادها 7 8 10 المصروفات
قولوا الفائض بمشي لمين
والله خسائر والله مهازل

الغالي ابوناجي
الشكر كل الشكر علي المرور وحميد مدرسة متفردة مثل مفرداته وفكره فله التحية ولك مني مرة اخري التقدير والشكر