أهـــل الــعـــوض

ماذا قالو عن أهل العوض . مزمل محمد ودعة الله

اهل العوض مصطلح ماخوذ من نكتة اطلقها الاخ محمد موسى العضو بفرقة تيراب للكوميديا ولعلها معروفة هذه النكتة وارتباط الاسم بالمُسمي
ولكن لم يكن يدري محمد موسى ان هذا الاسم سوف يحوره الناس ليقرنوه بشريحة معينة من شرائح المجتمع السوداني البسيط ويظل عالقاً بها الى الابد هذه الشريحة هي اهم شرائح هذا المجتمع على الاطلاق لانها تمثل السواد الاعظم من السودانيين البسطاء المسالمون الطيبون والذي ينتمي اليهم حتى محمد موسى نفسه من منا لا ينتمي لهذه الشريحة من الناس ..
ولكن البعض من الاخوان ربط هذا الاسم فقط بابناء منطقة الوسط او قل منطقة الجزيرة بالتحديد كل ما يسالك احدهم من اين انت ترد عليه من الجزيرة يرد عليك اها ناس اهل العوض ، وهكذا وكانها نبزة بالعامية وانت تتضايق وتسب وتلعن ولكن هل توقفت مرة وسالت نفسك من هم اهل العوض الحقيقين والذين اذا عرفتهم تشرفت بان تكون واحداً منهم وتتمنى ان يناديك الجميع باهل العوض
من هم اهل العوض ..انهم اشرف الناس واطيبهم واكرمهم واكثرهم غيرة على العرض والشرف واحرصهم على اكرام الضيف ونجدة الضعيف ومساعدة الغير ، الا يتمني احدكم هذه الخصال؟ بلى والله كل منا يتمنى ان تكون هذه الخصال فيه اذا نحن جميعاً ( اهل العوض ) ..
ولعل ابلغ رد يؤكد هذا الكلام ويرد الحق لاهله ويمجد هذه الشريحة التي انتمي اليها بفخر هو ما كتبه شاعرنا الكبير الرائع الاستاذ يوسف القسم ود الشوبلي رداً على سخرية محمد موسى من اهل العوض فماذا قال له :
رسالة بليغة من أهل العوض مخصوصة
للإبن الظريف ود المدن ود موسي
بدور رد السؤال لو باللغة المهموسة
فينا نقيصة ولا الصورة جات معكوسة ؟

جبتا الفتنة تعلن حرب بى جاسوسة
والسبب الفنيلةالقلت في الوسخ مدسوسة
نحن نفوسنا في بحور العفاف مغموسة
مية غمسة لاعار لا دنس لا سوسة

نحنا أهل العوض والعزة ما بنكوسا
أصحاب سمته وأصحاب فرسةً موروثة
نحنا أنعامنا بتعاف ترتع المعفوسة
ونحن جدودنا عادي بطيعوا الجاموسة

إيانا أهل العوض أهل النحاس أب رنّة
أهل البَدر ة والمهيوب وأهل الشنّة
أهل عزة وأهل سمتة وعروض ومحنة
ناس البادية ناساً عشرتن تتمنى

نحن أهل العوض حافظين عهود ما خناّ
وللجار و العشير بالشينه ما تعجلنا
بيوتنا مسيد ضيوف زمن العدم ما بخلنا
وما بصح الوليد في أعرافنا يجاهلنا

ونحنا أهل العوض والله لاتقينا ولا تبدلنا
واثبين كالأسود من واجبة ما اتماهنا
في البر في البحرتلقانا وين ما كنّا
في قمم الرجال كذب البمِس لى حصونّا

ونحنا أهل العوض في الحالي و الفات كنا
قج شرك الكلا م في مشينا ما بعطلنا
بس بوعيك أكان دقس في أصولنا ومتجاهلنا
نحسب في الجدود ستين ومن غير إنََّ

ونحنا ربّونا الشياب فوق ماما ماتعجنا
حافظين لسان حافظين كرامة أهلنا
أشبال من أسود في ضبعة ما تهجنا
سايرين سير كرام لامن نلاقي اجلنا

ونحنا ذاتنا يا ود موسي ما بواخذونا بي بنولـِّد
و الـما عندو رأي حقو يتبع ويقلد
لو ما مخـّك المخمود وحسك المتبلد
جامعة موسكو ما جابت دكاترة تولد ! ؟

ما راعيت شعور الناس شعورك فاترة
بتسيء للعزار أهل السيوف الباترة
أَمَانةً تَدخنك شطة ودموعك قاطرة
ما سمعت بالولادة أتخصصولا دكاترة !؟

نحن والله عرب وأولاد عرب لينا الشرف والعز
بنسرح بالرزق نحلب نصـُر ونجز
ويوم الحارة والعركة السلاح برز
ثابتين كالجبال الشامخة ما بنفز

المخسوفة والمرقوعة ياها لباسنا
المجلوبة والمقنية من ميراثنا
الجار والعشير من الكتف لى راسنا
في المال والعروض تخشى الملوك من باسنا

ليه يا ود موسى بتذم الرجال بالعايلة
ما بعشّوا الضيوف تحت السحابة الشايلة ؟
ما سمعت في أم همج كاكوم عقيد الزايلة ؟
ما سمعت بالنمر حرق الخديوي القايلة ؟

لكن لسانك فك يا إبني أصلو مابتستامن
تشحن في النفوس من الغبينة مُداماً
بس سمة المن مثالك في البحر بترامن
العربي إن رقص ألبل قرونن قامن

دحين ياخي رغم الغطرسة بالتمثيل وحبة كاشك
تلقى أصفارنا أكبر من مساحة داشك
شبعانين طحين من الفطير ودراشك
أخير تبعد بخاف من شوكنا يخرب شاشك

ومهما زعمت من عزة ونفخ فشفاشك
أعلم طينّا أنصح من تراب خشخاشك
شوف ليك ناس رخاس تاخد عليهم فاشك
أول غلطة كان تنيتا بنعل خاشك

دحين ياخي اولاد عرب والغير عرب كلهم أخوانك
إحذر واكترث شكل قوافي لسانك
والرمي فوق الجماعة بالتعابير خانك
في نص البحر بتدور تقج صيوانك ! ؟

نحنا نضافنا يا ود موسي مو صابون
نحنا نضافنا فى عروض وشرف مصيون
نحنا نضاف ضراع بالدكري المسنون
طيبين عُشرة ولكن للخصيم طاعون

نحنا سماحنا يا ود موسي مو كريمات ولمعة لون
نحنا ولدنا عاشميق عكس للعرجون
نحنا ناس لينا أعراض بيحكما القانون
سماحة الزول يفرّج كربة الممحون

نحنا دفعنا يا ودموسي ما جركان
ونحنا ما بندفع الجبنة وحليب الكان
ونحنا دفعنا فى النوق أمات سناماً بان
نحنا ضربنا للعوق انفجار بركان

وكان كلمنا يا ود موسي بنقول الكلام حقاني
وكان غنينا بنخت الشعر فى معاني
عزيزين فى النسب من ذلة مابنعاني
نحسب فى الجدود ستين ومن غير عاني

دحين يا غبار الكبرياء المن المعالم حاجب
أحذر منّوا لا ينسيك حقوق الواجب
ومن أمثال تراثنا الفي العرف والواجب
مهما العين تطول مابتعلى فوق الحاجب

وعشان ما نغلط معاك ونشيل النقط من شينك
أوعى تعضعض الناس البوضحوا شينك
هسع وقعت في الحلة ووجب تكشينك
شن ودّاك لشعراء البطانة تشينك

دحين ياخي الطامع في كثيرة الغير قليلتو تضيع
وسيد بيت القزاز ما ببدأ بالجديع
بولاد الحديد القاسي في القطيع
العربي إن حرن وسط المحاص مابطيع

نحن والله لا بنخاف لا بنعاف ولا بنتهدد
لا بنكل ولا بنمل ولا بنتردد
كمان للزول البخون عُشرتنا ما بنتودد
نبقالو البلا في كل فِجَة مَمَدَّد

هولاء هم اهل العوض بكل مورثاتهم وخصالهم الجميلة من منكم الان لا يتمني ان ينعت باهل العوض
ايانا اهل العوض

انا من الليلة من اهل العوض ...

والله كدا الصورة واضحة والواحد يقدر يرد على اخوانا الضناقلة والمحس بعين قوية

والله شرف لينا يا ناندا

اكيد واضحه يا ابوسلطان وديل أهل العوض اهل العز والطيبه والكرم واحرصهم على طاعة المولى عز وجل فتجد المتعلم والذي لم يتعلم حافظ حدود الله عز وجل ونعم الأهل والله يا ابوسلطان

عاد كلامك مو كلام يا ود اسيا
هيع اتقلب يا التكتوك
علي الطلاق ذكرتني جلسة جدي عبد القادر مع رفاقو في زريبة البقر
ويشيلو ويتجادعو بالشعر والدوبيت

تحياتي يا فكري ومالك داير تفتح علينا باب الدوبيت الجميل ده وعلى العموم يا فكري الدوبيت ضرب شعري غنائي أشتهر به سكان المناطق الرعوية في السودان وزي ما سمعت انو اصلها يافكري فارسية مكونة من شطرين أولهما دو ويعني اثنين والمعنى واضح وهو الشعر ثنائي الأبيات وياحبذا لو تدينا جدعه واكمل ليك يا عم

انا الليل والليل ليلينا والا تاني النار يا جنا
الرسول اسيا وين مشت وقالو في السريحة حصلت
كوريكولا انبقا ما ابعدت
سمعت الكوراك قبلت
مادي امخشيم الما جاب غلط
وجيت اعدي المركب رمت
وجيت اعوم حماني الصقت
وما بسيبا امعشاً دهب
إلا سيفاً ياخذني تب
ولا تاني النار يا جنا
الرسول يادي اسمك منو
اسمي اسيا عايز شنو
وحجلك ابعشرين نقشو
وجابو زايد المال تقلو
ومنك الجيران ماشكو
واااا شهر رمضان ترهو
ويا فريع السلم الرقيق
مابتشيل قمرتين طبيق
واحده تنشف الريق
وواحده تفك الضيق
وديل ناس اسيا الاثنين سوا
واحدة للعيانين دوا
وواحدة عجوة من غير نوا
ويا كرمة في سريحتة
اااخ انا المصراني اتلوا
وجيبو لي الدوا
واااا شوامت الما عندو مال
البصيح وينجع بالجبال
بت عمو اخدوها الرجال

اللول اللول يا رباعة
وناري بتزيد كل ساعة
الخدود كان خفس الرتينة
خمسين نفر مفقودة فينة
البشيلن نومي اتقسمنو
كتير المثلي انا هبلنو

الحاجات دي يا ابو جاسم كتيرة بس الواحد ما مستحضر

ماني القاعد براعي الضان
وختّاراً ببيت فوق قُجة أُم كيعان
صبّاراً على قدر الإله إن كان
أنا أبو فاطنة في اليوم السيوفو سنان

*أنا ماني الفي البيت صِنٍعتي حليبْ
بَدور الشًّدّة فوق إبلاً شوافي ونيب
إن حرًّت نخت الشكرة ما بنعيب
وإن بردت نكافيبهن سوالف أم طيب

الليل حيلو روح وحس سروجنا يبنِّنْ
جدع النمّة ود أب زيد وصوتو يحنِّن
نحن الكُسًّر النظرة عيوننا تجنن
ديمة درقنا بي دم الرجال متحنن

كم شديت على تيساً بسوك الناب
وكم جايب زَمَل من الرَّهد كَسّاب
حديث الناس كتير .. ما عندي ليهو حساب
إنقطَع اللسان يا فاطنة أبوك إن عاب