سلامة كبيرة ...

بسم الله الرحمن الرحيم

مقال منقول ... من جريدة الرأي العام السودانية

عدد يوم الخميس : 12/ مارس / 2009 م الموافق 15 / ربيع الأول / 1430 هـ ، العدد رقم : 22618

عنوان المقال : سلامة كبيرة

حاج عبد الودود رجل متفائل.. في أحلك المواقف يبسط الأمور.. فإن حدث حادث حركة .. قبل أن يرى شيئاً يردد:- سلامة.. سلامة كبيرة.. وبعد أن يسأل انشاء الله مافي عوجة.. لا بس السواق مات.. سلامة كبيرة.. كان ممكن يموتوا الراكبين معاه.. وإن وقعت امرأة مسنة.. يصيح سلامة.. سلامة كبيرة.. فيحملونها الى المستشفى وبعد صور الأشعة يتضح انها كسرت حوضها ورجلها اليمنى ويدها اليسرى.. فيواصل بعد ذلك سلامة كبيرة.. كان ممكن يحصل ليها ارتجاج في المخ.. وتنشل.
في الخريف وقع حائط منزل حاجة حوا ومات أبو الوليدات وابنه الأصغر إذ كانا جالسان تحت الحيطة فيقول: سلامة.. سلامة كبيرة الما كانت قاعدة العايلة كلها.
مرة جاءت البيت ابنته المتزوجة تسحب أطفالها باكية.. الراجل طلقني.. أخذ يردد: سلامة سلامة كبيرة الما طلقك بالتلاتة.. بين دموعها تقول له: طلقني بالتلاتة يا بوي: يقول سلامة.. سلامة كبيرة.. لانو البطلق بالتلاتة ده معناها منفعل شديد سلامة.. سلامة كبيرة ما مد إيدو عليك.. كان عمل ليك عاهة.
مرة في بكاء حاج (عبد الدايم) قال لولده الكبير بعد أن شال معه الفاتحة.. المرحوم مات بي شنو؟ فقال له: جاتو ذبحة .. فقال له سلامة.. سلامة كبيرة الما مات بالسرطان كان اتعذب.
أضجر تفاؤله ناس الحلة فشكوه لأبنائه فاضطروا للاجتماع به وقالوا له: ناس الحلة شكو منك.. فقال سلامة.. سلامة كبيرة.. فقال ابنه الأكبر بحسم: سلامة كيف يعني.. سلامة كبيرة يا ابني عشان البقت على ناس الحلة ما شكوا معاهم ناس حلة تانية.
أخيراً قرروا أن يعاملونه بالمثل فإن شكا من الرطوبة قالوا له: سلامة.. سلامة كبيرة الما عندك معاها سكري ولا ضغط.. فما ارعوى قال لهم: صحي والله سلامة كبيرة.. لما أعيت الناس الحيلة تركوه في حاله واستحملوه ولكنهم أصبحوا يسألونه سلامة كيف يعني؟ عسى أن يخونه التعبير فيوضحون له ان نظريته خاطئة.
ذات يوم.. حدث حادث جلل في الشارع الرئيسي حافلة انقلبت ثم اصطدمت بها شاحنة.. فجاء الى الموقع يردد سلامة.. سلامة كبيرة.. فقال أحد الحضور ويبدو انه غريب: سلامة كيف يا حاج.. فقال: ماتو كلهم.. فقالوا: كلهم .. الحافلة انتهت ولا بتتصلح.. فقالوا: الحافلة بقت حديد معجون.. قال سلامة.. سلامة كبيرة.. فقالوا له: هذه لحظة المجابهة.. فقالوا له: الناس كلهم ماتوا.. والحافلة انتهت فكيف تكون سلامة فرد عليهم: سلامة.. سلامة كبيرة إننا ما كنا راكبين معاهم!

ملاحظة :

الكاتب / سعد الدين ابراهـيم

والله دى سلامة كبيرة ... سلامة كبيرة انى ما بعرف الزول دة !!!!!!!!!

يشبه عمنا ياسين ود حاج عبد القادر بس الفرق إنو ياسين بقول ( والله ما شاء الله ) .
الله يديهو الصحة والعافية .

ناندا كتب:: والله دى سلامة كبيرة ... سلامة كبيرة انى ما بعرف الزول دة !!!!!!!!!

الأخت الكريمة / ناندا

لكن جميل أن يأخذ المرء بعض الأمور ببساطة ،،،، لكن طبعاً ليس بصفة مستمرة و مستديمة على طريقة عمنا حاج / عبدالودود ، لأنه متفائل شوية أكثر من اللازم ....

ريال مدريد كتب:: يشبه عمنا ياسين ود حاج عبد القادر بس الفرق إنو ياسين بقول ( والله ما شاء الله ) .
الله يديهو الصحة والعافية .

الأخ العزيز / ريال مدريد

لقد أعجبني هـذا المقال و أنا أتصفح جريدة الرأي العام السودانية ، عدد اليوم ، الخميس : 12 / مارس / 2009 م ، في الحقيقة يوجد بعض الناس ، هـذا طبعهـم و طابعهـم .... كل شيء عندهـم بسيط و غير معقد ، و هـذا المنهج في رأي و تقديري مأخوذ من المقولة الشهيرة و التي تقول :

كل شيء يبدأ صغيراً ثم يكبر ، إلا المصيبة فإنها تبدأ كبيرة ثم تصغر .

عمنا ياسين ود عبدالقادر
مره مشي السجن زياره وقف في الباب وشاف المساجينوقال ليهم
ماشاء الله متجمعين دايماً كده يا رب

حلوة جدا يا فكري والله أضحكتني كثير على الرغم من إنها مرت علي قبل كدا .

فكري عصام كتب:: عمنا ياسين ود عبدالقادر
مره مشي السجن زياره وقف في الباب وشاف المساجينوقال ليهم
ماشاء الله متجمعين دايماً كده يا رب

الأخ العزيز / فكري عصام

رائعة و جميلة .... يا فكري ...

لكن أظن أن الرجل يقصد أن يجتمعوا دائماً على خير و في خير ... طبعاً هـذا ليس ظن بل هـو يقين ، إن شاء الله تعالى ، و إلا كيف يكون الحال و هـم في السجن .... و الدعاء لهـم بعد ذلك ليكون مجتمعين فيه ... هـذا لا يستقيم أبداً ...

دخلت امرأة على الإمام الشافعي ( رحمه الله تعالى ) ، و كان الشافعي يومها مريضاً فصارت المرأة تدعو للإمام بالشفاء ، لكنها لحنت ( من اللحن في القول ) .... فقال الإمام الشافعي : اللهـم بقلبها لا بلسانها ...
و نحن نقول عن العم / يس عبد القادر ... اللهـم بقلبه لا بلسانه ...

ياجماعة التفاؤل الحسن حاجة كويسة واضح إنوا عمنا عبدالودود من كترة تفاؤله بكل شئ بقت سلامة في لسانوا زي الكماسرة النائيمين وشغالين واحد عربي عربي والتاني بحري بحري والتالت شغال يأشر بيدو دا كلو في النوم

سلامة كبيره يا ريال مدريد الما ضحكتك حتي البكاء

يا اخوانة التفأل نعمة ديمة يريح الاعصاب
والزول البكون متشأم العصفور يشوفو غراب

عدد الرسائل : 1 العمر : 38 تاريخ التسجيل : 16/03/2009

كيفك يا فكري
والف مبروك
فووووز الهلال
بامضاء مهند الطاهر