قمرية في الخرطوم

[b]طار الكوري من العاصمة متجها إلى ولاية الجزيرة حيث يسكن اهله
وبعد مسافة من الطيران وصل إلى موطن اهله...فلمح والدته الدباسة وهي تجلس على شجرة.فنزل لها وسلم عليها بلأحضان
الدباسة:حمد لله على السلامة ياولدي بركة الرجعت لي بلدك
الكوري:أهلا كيف حالكم وين
أبوي! المدين وأختي القمرية؟
الدباسة:أبوك ماعندو عوجة
مشى مع ناس الحلة يشوفوا
لينا مكان نسكن فيه.
لكن أختك من يوم خطيبها
الحموري ما راح وهي كل
يوم تقوقي.تلقاها هسه
حارسة البحر.
الكوري:وخطيبها مالو الحصل
ليه شنو؟
الدباسة: قبضوه بي قلابة
الكوري:هم المتخلفين ديل
لسه ما خلو الشركة دي.
الدباسة:اولاد قاعدين عطالة
ساي.وابهاتهم ذاتهم عاطلين
خلو الزراعة وبقو قاعدين
في الضللة.
الكوري:لكن إنتو يمه المفروض
تعملو حسابكم
الدباسة:نمشي اي حتة نلقاهم
في البحر وقدام الدكاكين
والطاحونة.نعمل شنو بس
الكوري:ما قلت ليكم تعالوا اسكنو معاي في الخرطوم
وانتو ابيتو.
الدباسة يعني إنت راجع
الخرطوم تاني؟
الكوري:والبقعدني هنا شنو؟
الخرطوم العيشة فيها ساهلة
والأكل راقد.والشفع هناك ما
فاضين.ولا بعرفو الشركة.
لعبهم كلو بلي استيشن وحاجات
زي دي.

الدباسة:هسه عليك الله ياولدي ده جو بنفات.
الكوري:لو مشيتو الخرطوم هناك حتتعودوا.
الدباسة:نحن بلدنا دي ما بنفوتا
الكوري:هسة الشجرة الساكنين فيها دي شنو؟
الدباسة:دي إسمها شجرة المسيكيت واعمل حسابك ياولدي فيها شوك حار خلاص
الكوري:والمسيكيت دا القومو هنا شنو؟
الدباسة:ماعارفة شدر مامنو اي
فائدة ملأ البلد كلها
الكوري:وين السنط؟وين الطلح والحراز والسيال؟
الدباسة:الطلح كملتو النسوان دخان وباقي الشجر قطعوه ناس الكماين.عشان كدا بنفتش لينا في حته تانية نرحل فيها.
الكوري:ترحلوا وين يايمه؟انا جاي طاير ما لاقتني أي غابة كلها مصانع حديد ودخاخين وفيافي
الدباسة:الناس خلت الزراعة جاعوا وجوعونا معاهم
الكوري:هسه يعني حاتمشو معاي.
الدباسة:أنا لو رضيت أبوك ما حيرضى
الكوري:خلاص أسوق القمرية أختي تغير جو لأنها طول ماهي قاعدة هنا حتكون متذكرة حموري
الدباسة:لو رضت سوقها طوالي
‏(‏(ينزل على الشجرة الدباس ومعه ابنته القمرية))
الدباس:إزيك ياولدي
الكوري:اهلا يأبوي وازيك يالقمرية
القمرية:إزيك انت يأخوي
الدباسة:وإتلميتو وين كده
الدباس:لقيناها حارسة البحر تقوقي
الكوري:يالقمرية ياختي.الموت علينا حق
القمرية:كان عرسنا خلاص قرب وكنا سعيدين بنبني في عشنا سوا.
الدباس:يا بتي البكاء بجيب شنو
الكوري:خلاص من بكرة اسوقها معاي
الدباس:تسوقا وين؟
الكوري:اسوقها معاي الخرطوم
الدباس:مش كفاية مشيت إنت أبيت بت عمك وعرست ليك قمرية تربية كوش
الكوري:يابوي مرتي مافيها كلام بتحترمكم وتقدركم
الدباسة:اسع يالحاج الكلام دا مافي ليه داعي والولد جانا بعد غيبة مفروض نونسو ونحتفل بيه
الكوري:وأختي القمرية دي لو مامشت معاي حأتموت ليكم هنا ساي
الدباس:خلاص سوقها يمكن تنسى.بس تحافظ عليها كويس،لا زواج عرفي لا صحوبية
الكوري:انت بتوصيني علي اختي

عزيزي ريال مدريد شكرا على المرور
وإليك الجزء الثاني

[b] مع بزوغ الفجر يودع الكوري والديه
الدباسة: خلاص ياولدي بقيت ماشي
الكوري: معليش يأمي كان بودي اقعد معاكم لكن زوجتي براها وهي تقيلة كمان
الدباسة: يعني خلاص حتبقى اب
الكوري: ايوا يمة
الدباسة: مرتك الجيران ما حيقصروا معاها
الكوري: نجنا ما عندنا جيران يمة
الدباسة: كيفن ماعندكم جيران؟ وساكن وين
الكوري: ياكنين مع اسرة
الدباسة: ماخايفين منهم
الكوري: هناك يمة الناس مسالمين
الدباسة: ده عشان شبعانين لكن لو جاعوا بكرة بقبلو عليكم
الدباس: مادام ناس الهنا خلو الزراعة ومشوا ليهم اكيد حيجوعوا
الكوري: اهو لحدي اليوم داك يحلها الف حلال
الدباس: خلاص ياولدي ابقى عشرة على اختك وإنتي يابتي احفظي نفسك
القمرية: ماتخاف علي ياابوي مع إني خلاص قلبي مات
ثم يطير الكوري واخته القمرية متوجهين إلى الخرطوم