أهل الفرحة رائعة محمد طه القدال.

نحن أهل الفرحة جينا
لا المدامع وقفتنا ولا الحكايات الحزينة
لما درب الرايحه جابنا جابنا فى هادى المدينة
ياوليدى الدروب شقاقا بحر التيه
ليك درب ولا دربين مساك الدروب ضهاب
ليك قلب ولا بالين وسواى القلوب كضاب
ليك ضهر ولا سرجين ركاب السروج وقاع
شق يا ولدى بحر التيه بتتدردر وتتودر
ولا من يوم على تايتنا ديك ترسى
نعزك بالقبيل داخرنو ليك
الشوق بحر يا ولدى بحراً تيه
قت العليك ادرابو لا تنغش ولا ترضابو لا تنغش
فى الزمن الزمين والكى يسوهو خلاف عشان النى
عليك الدور وتصريف الليالى بدور تشيل ما شلنا من الهم
ولا من دمعه ترمى الدمعة فوق دربك
روح يابا .. وابق قفاك لا تعاين على موطاك
ولا تندم على خطوا تملى مشيتو لى قدام
وابقى العاتى زى سنطتنا زى صبرا
نلوك فوق مرو زى الزاد
لا شيتاً نزل فى الجوف ولا برجع ولا بنزاد
واركز للبجيبها الريح تقيف انت ويشيلها الريح
وابقى العاتى والدرب الوراك مسدود وشيل شيلتك
بقيت للنص لا حلما بجيب البر ولا حدود
وانبليتا اختا الرمله ما تقع البكان الهش
هى الممطورة ما بتبالى من الرش
النعمة بتعرف عاطيها والجمرة بتحرق واطيها
بالكيلة عطانا وما لقينا فوق جمر خطانا وما لقينا
يوم الوعد .. يا حليوه فيك الدنيا ما كانت شروق
إلا الأرض متكشفه متبلمه نعمنو من خير الخريف
لا فحالها شال منطرحه خضرا وفرحة دوب تتشابى
لى عين الشمس ... ...
من بت حليوة النفس بيضا كذا الحليب
والروح مشحتفة فى البلود الفيها ريحتك
للبعود من فزعة الغربة البساسق فوكا
مو راجع ولا بالحيل قريب
الروح مشحتفة فى الحبيب القلب بكر الدنيا ما شافت جديدو
ولا الحزن دقالو باب ... ...
وشفتى كيف يوم الوعد كيفنو مترامى الغمام
والقمرى زغرد للبلوم النسمه هبت مرتين
يا حليوه يوم دقيت بارضك فاس خصيب والتانيه
فى يوم الوعد والأيد تسالم فى الايدين
والام تقالد فوق جناها تشمو زين
وحليوه صاحيه حليوة ضاحية كذا النسيم
والدنيا غيم وحليوة جد جد ياولد قول للبلد
قايل غناوى الحزن ليش شايل مساديرك مجامر دمع ليش
ليش يا بلد والناس تريد والدنيا كل ما نريد تزيد
تملا الايدين تفرح تهش
لو صحيح غنينا بالدمعة الحميمة ولو دموع الفرحة مالاقت غنانا
بكرة نرجع تانى للكلمة الرحيمة شان هنانا شان منانا
شان عيون اطفالنا ما تضوق الهزيمة .

والله اهل الفرحة يستاهلون الفرحة

وانت تفرح قبليهم

تسلم يا غالي على المرور الجميل وربنا يفرح قلبك وقلوب كل الأحباب بالمنتدى
واتمنى فعلاً انو نكون أهل الفرحة.

هي الممطورة ما بتبالي من الرش

النعمة بتعرف عاطيها والجمرة بتحرق واطيها

لك الف تحية اخي هشام علي الاختيار الجميل

وهو دلالة على سلامة الزوق

نتمنى المزيد والمزيد

طولته الغيبة يا شيخ عبدالرحمن وينك ما تحرمنا من وجودك وردودك البتبعث في البوستات نبض الحياة،،
شرفتني بمرورك.

مواضيعك كلها رائعة وانت اروع لانك هلالابي والهلالاب كلهم ذوق وفن

mak كتب:: مواضيعك كلها رائعة وانت اروع لانك هلالابي والهلالاب كلهم ذوق وفن

يا سلام عليك يا رائعه
والطيور على أشكالها تقع و الهلالاب كلهم رائعين بروعة سريحتنا العامرة.

صديقي هشام
كلمات لا يقولها الا من كان علي شاكلة القدال ولا ينقلها لنا الا من كان مثلك
ليت مثلي كانت له القدرة علي معرفة كيفية رفعها علي هذا البوست لتكمله بصوت الرائعون عقد الجلاد هي الان موجود عليى مكتبتي الصوتية المتواضعة لكني سأحاول
تقبل مروري الخجول،،،

تسلم يا رفيقي على هذا الإطراء الذي احسبني لست أهل له.

( عزفت على وتر حساس جدا بداخلي ) اخي هشام
( الروح مشحتفة في الحبيب ... الارض بكر ... الدنيا ما شافت جديدو ولا الحزن دقالو باب)
لك صوادح الاماني العذبة

مهاجر كتب:: ( عزفت على وتر حساس جدا بداخلي ) اخي هشام
( الروح مشحتفة في الحبيب ... الارض بكر ... الدنيا ما شافت جديدو ولا الحزن دقالو باب)
لك صوادح الاماني العذبة

أخي مهاجر أسعد دوماً بقدومك
و ان شاء الله الحزن دايماً بعيد عننا.