خارج التغطية

قد تنسينا زحمة العمل اشئاء كتيرة حلوة ولعل لكل واحد منا ذكريات واحلام كانت ولاتزال تراوده من حين لاخر منها ماقد تحقق ومنها من اسقط من حساباته عمدا او دون قصد او ارادة انا بعد ان شغلتنى الحياة وروتينها الممل كنت احسب ان كل الناس مثلى وكلهم مهمومين او ان الحياة صارت تمثل العمل وان لامجال للترفيه وللحب وحتى اننى اصبحت اسمى هذا الاخير بالكلام الفارغ ولكن اليوم اليوم نعم اليوم وبعد ان انتهيت من عملى بدرى حدثتنى نفسى بان اذهب لاكثر المناطق حيوية ونشاط فوجدت الخرطوم ماشاء الله تعج بالحب والنشاط ولا زال الناس اتنين اتنين كما كان يغنى المغنى حينا من الدهر ولكن وجدت نفسى انا فقط من يمشى وحيدا ورقم لايقبل القسمة وكان الجمال قد قسم هناك فى تلك الاحياء وما فاض توزع على بقية الولايات وجدت كل شئ حديث وكاننى اتى من زمن ماضى الكافتريات واصواتها والضحك نعم هو نفس ضحكاتنا الزمان حسبتها هى الاخيرة انتهت والجلسات العلى النجيلة (على النجيلة جلسنا ) وفى شمبات ياخالد وبساطى ساهرنا
ولسع الناس بتاكل اسكريم وتحلى باسطة
والله نحن بس الشاغلين نفسنا وعاملين الخط مشغول لامن طلعنا من الشبكة مرة واحدة
وحقيقة الناس لسع بتقول فى الكلام الدقاق والونسة الناعمه والهمس الخفى كيف لا العيون الناعسات وخدرة ناعمة وصوت حنين وكل زول عاجبو الجنبو (كل فولة وليها كيال) انا قايتو جنبى واحدة تنضم براها ماعارفها يمكن يكون بتنضم (كتر ) ولايمكن تكون فى الموبايل .فى الحالتين هى خسرانه هذا ماقلته لنفسى لانها فرصة واحدة اغبش زى كده ما اظن تلقاه تانى فى زمن الكريمات على الاقل يمكن تقول لصاحباتها انا لقيت لى (كنز ) واسع دايرة انفض منو الغبار : !!!!!

يا ود عجيب الدنيا دي ما بتتلحق والعمل الكتير هو البقصر العمر ويخلي واحد شعره يشيب قبل يومه والصلعة تنحت قبل الدخلة لذلك يا اخي اسرح وامرح واضحك(ضحك- لعب -جد)الدنيا ربيع قفل على كل المواضيع نصيحتي ليك ادخل توووووش (زي ما بتقول الزرقاء) في الجنبك دي وعاملة بتتكلم فى التلفون ولكن اظن ده شرك ليك لذلك اعمل فيها من اهل العوض وادخل فيها شمال

يا ود عجيب كل الناس البتقول عليهم ديل ما بقدموك ولا يأخروك
عزة الانسان بي نفسوه واتنين اتنين وخمسة خمسة وعشرة عشرة
بيكيفهم المهم انك انته تصنع ذات نفسك وتكون الحلقة الاقواى
في حياتك وصحصح انته كنز مشع ومتوهج وما يحتاج
واحدة تزيح عنك القبار وفرفش وابتسم للحياه من باب السعادة
والله أجمل ايام السعادة لاتنسى وانت كبير ان يقال لك مثل الكلام ده
وامشي عديل يحتار عدوك فيك
( خلي الكريمات دي للناس الفايقة ) انت انسان مثقف يكفيك

أبو جاســــــــــــــــــــــــــم

ده شنو يا ود عجيب الملاريا معقول تعمل فيك كدا اجري الحوادث قبل ما تدقشك عربية ويا ادمن احذف الموضوع ده بسرعة لانه الراجل ده كان صحه وشاف الكتبه ده ما اظن يدخل هنا تاني

الاخ ودعجيب ليس هذا غبار الموجود فيك هذا يئس من الحياه لاتجعل الحياء ويئسها يتغلبه عليك أجلس مع نفسك واجعل الحياه أمامك سهله وكل شي في الدنيا قسمه من الله عزه وجل أرسم لنفسك هدف معين لتحقيقه واسعه أتجاه يتحقق بمشيئة الله

ودعجيب كتب:: قد تنسينا زحمة العمل اشئاء كتيرة حلوة : !!!!!

هو ده اللي حاصل يا ود عجيب

كل واحد فينا بيفكر في نفسه وفي النهاردة وبكرة ( بتاعه هو بس )

والحياة سرقتنا وضيعت سنيننا في الغربة والجري وراها

واصبحنا نجري يمين وشمال وشرق وغرب وتحت وفوق ناسين ان نفكر في الاستمتاع بالحيا

انا نفكر فقط في كيفية استمرار الحياة ولا نفكر في كيفية الاستمتاع بها

واقولها اخيرة

ان الحياة حلوة بس نفهمها

ربنا يديكم العافية واشكركم على تعليقاتكم والتى اسعدتنى كثيرا انا لم اكن اتخيل كل هذا المرور الجميل فقط انا كنت ارسم ما يجول بخاطرى واحاول ان اجمع خيوط افكارى وادعكم انتم تلونونه وتصبغونه بارائكم النيرة فمنكم استمد البسمه وابدلها مكان الاهة واستمد عزيمتى فلكم منى كل الشكر ودعونى امر على تعليقاتكم واستخلص العبر

الادمن : يا اخي اسرح وامرح واضحك(ضحك- لعب -جد)الدنيا ربيع قفل على كل المواضيع
ابوجاسم : المهم انك انته تصنع ذات نفسك وتكون الحلقة الاقواى
في حياتك وصحصح انته كنز مشع ومتوهج وما يحتاج
واحدة تزيح عنك القبار وفرفش وابتسم للحياه من باب السعادة
زرقاء: الملاريا معقول تعمل فيك كد : والله اكتر من كده !!
بيجو : هذا يئس من الحياه لاتجعل الحياء ويئسها يتغلب عليك أجلس مع نفسك واجعل الحياة أمامك سهله
سقراط:ان الحياة حلوة بس نفهمها