اذا عادت بنا الايام

أغنية «اذا عادت بنا الايام» أداء الفنان الراحل مصطفي سيد أحمد وكلمات الشاعر عوض مالك :-
إذا عادت بنا الايام للماضي
اذا عادت ..
كتبت علي ثواني العمر
شعراً لا يدانيه
غناء الطير ..
همس الماء ..
وشوشة الضيا .. فيه
ركبت زوارقي ..
ابحرت في شعر لها مسدول
جعلت مشاعري جندول
اذا عادت بنا الايام
يوماً ايها الاحباب
ولو في زورق يمضي علي الصحراء
فوق سراب
انا ملاحه الفرحان ..اطرق مغلق الابواب
اجدف .. لا اجدف .. ليس يعنيني
لاني قادم من حاضر الساعات للماضي
وبي شوق سيشعل صمت هذا الزورق الهادى
فيدفعه الى الوادى
الي أفق .. أنيق النجم صداح البساتين
وأشدو حين تأتيني ..
فتاة
لثغة العصفور دفقات الصباح الطلق
نسمات الرياحين بكفيها ..
واصداف البحار الزرق..
صبوات السماء الطلق تسبح بين عينيها !
ولي في عمق هدبيها
حكايات وأشعار
ولي في شعرها الهفهاف أخبار
إذا سالت علي وديانه الخضراء امطار
اذا عادت بنا الايام للماضي
اذا عادت ..
كتبت علي ثواني العمر ..
شعراً لا يدانيه ..
غناء الطير .. همس الماء
وشوشة الضيا .. فيه .
إذا عادت بنا الايام

نسال الله أن تعود بنا الايام ياودعجيب

ما اظنو !!!!!!!!!!!!!!!!!! يابهيج _ الايام دى نحن الغيرناها

الاخ ودعجيب ليس نحن الغيرنها قيدةالزمن والحياه وتطلعتها وطلباتها هي التي غيرت ونتمنها تعود ليش الاسفهام 0

غدرت ايامى جارت خاته بينا ستار

ويناتل فى الرسن دا القعود هبار

طارى الخترة وقت النجمة والاسحار

نغشى الريلة لى زوادة القنيص الحار
_______ _ ___________

دى رسالة من واحد لاهل بيته وهو فى الغربة

من وين ابدا ليك واقـــــول ....
من البيت التقــــول مسكــــون
واللهْ من الشغــل والزحمــة ...
والصبـــر الوِصِــــلْ فـــي الزون
المستشفى كان شفتيها .. زيـَّها زي سجن وأكتر
ليــها ابواب حديد ماكنات .. وجـــوَّه ملانة بالعسكر
أوَّل حـاجة نعمــلا بدري نجــي جــارين علي الدفتر
نوِقـِّـع إنــو جينــا خلاص .. ومــــافـيـش حدِّي إتاخر
وكـــلو دقيـــقة ليــها تمــن ...
تتأخر دقيقة ..يكون راح يومك عليك سُدن
مخسومات تلاته ايام .. ويرفعــوا ليك كرِتْ أصفر
ولـــو اتكــــرر التأخيــــــر ...
تجلس لجنــــة الحكــام .. وينقــلب الــكرت احمر
وتتحـوَّل علـــي التحقيــق .. وزيــن تنذلاَّ تـتـنهزر
يقعــد (أبو سعـود) قــدَّام يلــف بالكرسي يندوَّر
ويدِّي (عقالو) كم زحَّـات يولـِّــع نور عيونــو خطر
ويدِّيــك من كــلاماً نوعــو حنضل ضُمه زئ الشر
يا دربك مَسكتو عديل .. والله كمان شردتَّ طفر
أماني بقينـــــا خـــــوَّافيـــن ...
نقــوم فجَّــاري شوفة العين ..
ولــو مــره الزمن ضايقنا...
بس مــو عـــاد نقوم جارين..!!
باقيــــلك نسَـوِّي شنو...؟؟!!
يا نكـْـتل قلبنا نعيش .. والله كمان نصُد راجعين
منعول (الريال) وطريقو .. البقى لي دقـونَّا يهين
أمَّا عن الشغل (والأشعة) جوطة تطـَرِّش اللضنين
شغلنــا مصاقـر (الشـَّـفع) أبْ سنتيــن وأب يومين
تجيكي الواحــدة زي الخيمة متلفـَّـالا فــي توبيـــن
جارَّا ليها دستة اطفال .. كبيرن عمرو ستة سنين
واحد في الكتـــف مشيول ..
منفـــوخ شكلو زي الغـــول
وواحد في البطن مقفـــول
وخمسة وراهــــا متقاطــــرين..
واربعة واللهْ خمسة هناك فوق الكنبة منتظرين
ضُمه النـــاس دي ولاَّديــن ....!!!
بعد سنتين يفوتــو الصيــن
لا في نظام ولا في (حُبوب) عليك يا الله منبهلين
وفوق طربيزة الاشعـــة تحَـلـْــفي تقـولي حدَّادين
الشافع يكــورك ويبكي .. صوتــو يحسِّسْ النايمين
الأم ماسكة في الكرعين ..
والأبـو قـــابـــض الليديــن
ارقِّدو جاي .. يقبـِّـــل جاي
أودِّي شمال .. يجيني يمين
أشاغل فيهـــو بالحركــــات ..
اصفـِّرْلـــو واحنِّسو زيـــن
ولامن ينتهي التصوير ..يكــون الزول قطــع بنزين
أمَّا البيت وهَـــوَسْ البيت .. عزَّابتاً يشرْطو العين
جداد في اللعبة لينا الحق ..
دلعتـــونا يا حلويــــن ..
علَّمتونا عيشة اللين
نلقى اللقمة جاهزي ودافي .. ناكل ونحنا مبسوطين
هدومنا مغسلات لامعات..
مطـَبـَّــقة ديـمة مكويـــات
لافي زرارة مقطوعة .. ولا مشروطة بالجنبات
دلعتـــونا يا حلويــــن
علمتونا عيشة اللين..
نكَمِّـل ضل ...نزِح لي ضل
أمــورنا مَمَشَّــا زي الفـــل
ابــــداً مــــا دخلنـــا تـُكـُـلْ
لا غسَّـلـنا .. لا كنــَّسنا ..كنتو الكـُـل
دلعتـــونا يا حلويــــن ....
علمتونا عيشة اللين
مهــذبَّـــ بيتنا ليهـــو نظــــام ...
مشدودات ملاياتو .. آخر بهرجة وهندام
أقوم من نومي .. ألقى الدايـرو كلو تمام
مجهَّــزة مويتي في الحمًّام ..
حتى الليفــة والصابـــون..
هناك الفرشة والمعجون ..
ومحظـــوظ (يا خُلالي)......
الديمة في التسريحة أمان وسلام
دلعتــــونا يا حلويـــن ...
علمتونا عيشة اللين
دايما لي الهموم شايلين
ونحنــا متندليــن نايميــن
وفجــأة بقينــا مقطوعيـن
والبنسوِّي مــــا عارفيـــن
فقدناكم كتير والله يا حلوين
بلاكــم واللهْ خربـــانه ..
بلاكــم وا هملنــــا يميـــن
البنسَوِّي أشتر كلو اخَرَقْ وشين
سواتْ الحَـلـَّـة أكبـــر هم
كــان (فاصوليـا) واللهْ (الباميـــة) والله لحم
قِطـِّيع (البصل) غالبنا ..سوَّا عيونَّا زي الدم
نصاوطا... مـــرة تتحــرق
كتير ننساهو كبَّ الموية تقْبض عاد وتتلصَّـق
وريحتا من بعيد تنشم
مليانــات ادينــا سجم ..
عرقنــا يخُــرْ .. ضهرنــا يقيـــف ويتـعسَّم
بعد داك تطلـــع الحَلة .. لا ميــز لا طعــم لا لـــون
طبيخ البامية كان شفتيهو .. طافح زيتو ليهو عيون
يزوغ منِّي (الملح) مــرات وينقلب الطبيـــخ ليمــون
حليلا ادينكــم الطاعمات .. حليـــلو أكِلْكم الموزون
صحيــح الدنيـــا قلاَّبه ..
مشقلب ديمة دولابه
تودِّيــك فـــــــوق .. تجيبــــك من تحـــت مطحـــون
كان شفتيني اتغيــرت .. كـُلـِّي بقيت صوف ودقون
خِدِمْتي بقت سجاير بس .. بقيت آخر الزمن كانون
نحــرِّق فيــها اعصابنــا وراسي من القلق مشحون
لــو الحال ده مــا اتغيـــر ... ميه الميه جن مضمون
وكان شفتيها أوضتنا ...
اريتــا هيْ نــان هيْ أوضــة الشــوم
مقلـَّبـا من مجاميعـو . مبهدلا والنـظام معَـدوم
هــــدومي هنـــاك في الكونية راقــــدات كوم
طبعا ديلا وسخانات ..غسيلن ما قطعْـتلو يوم
واطاتا الملانة ورق .. منطايرات جرايــد اليـــوم
بواقي سجايري والكبريت .. وحاجات مافي ليها لزوم
ووسخ البــارح المكنوس .. هنـــاك معــا الركن ملموم
ملاياتــاً مكرفسة ديمــة .. ملمومـــات وليهـــا جضوم
ياهــا دي عيشة العزابة .. بهدلا وإمتحــان وهمــــوم
حليــلك انتي يا أوضتنــا ... اوضة النـــوم
وحلات الدنيــا لمـَّــا السمحة فيهـا تحوم
وتنظـِّـما .. تبقى زي عِقـداً سمح منضوم
صحيح الدنيــا قلاَّبة ..والحــال العديـــل مشــروم
من عيشة النعيم والعز .. لي عزابي هام مهموم
أمَّـــا الليــــــل مصايبـــــو كتيـــرة ليــهـــا فنـــــون
تجي في لحظة تتلملم .. وانا اتقلـَّب بقيت ممكون
ازحَّها مني .. ترجـع تاني .. تتلون لِي في كم لون
ونلعب لعبة الدفـِّير .. مسجلة فيي خمسين قـون
واحاولَ النوم ... تعال يالنوم
تعـــال بديــــــكا طاسة دوم
وأعِدْ بي سِرِّي في صابعيْ ..
لامن أظـــن أصل مليـــــون
ويجيــني النـــــــــــــــــــــوم
ويصل السيــِّــــد أبْ كبـَّــاس
معــاهـــو المستـر الهلــواس
يخنقوني . واكــورك .. صوتي ليَّ يخـــون
مرات ألقى نفسي هناك بين سيخاً غُلاد مسجون
ومرات مرْمِي ليْ في حفــرة نُصِّي اللآتِحِتْ مدفـون
ومرات زاكني البعـَّاتي .. فاتــح خشمو ليهـو سنون
ده يـــاهـــو النــــــــوم...!!!!
كلو دقيقة انط مهَجوم ...
أحِس بي راسي فوقي كبير...
كمان باقي الجسم محموم
حليل النـوم هناك في حوشنا ...
الاَّ يقــولــوا لئْ كفى قـــــوم
بسـم اللهِ اصبحنـــا .. ومليـانـــات عيــوني نعـــاس
لا شيتـــاً يدفــــَّي الــزول .. ولا شايـــاً يوِزْن الراس
نبدا حياتنا من صبح الله في سرعة وسباق وكباس
وتبــدا الساقي تــاني تدُور .. اتوجَّهـت مكتبي راس
دي ياها حياتنا يالحلوين ..عيشة تبلــَّــد الاحساس
وبي كـــدي .. اللهْ يستر.. لا يكشونـا ويقولـو خلاص

منقول يابهيج عشانك

كبرنا وكبرت احزانا
وإنتوا كبرتوا وزدتو حلا
وزي ما القمرة تبدأ هلال
جمالك إنت يومي يهل

غدرت ايامى جارت خاته بينا ستار

ويناتل فى الرسن دا القعود هبار

طارى الخترة وقت النجمة والاسحار

نغشى الريلة لى زوادة القنيص الحار ...
الله يديك العافية آآود عجيب ... قلبت المواجع (قالوا الصقر أكان وقع كترتَ البتابت عيبو).. ياحليل الريلة والزوادة ...كُتِبت علينا خُطاً ومن كُتِبت عليه خطاً مشاها .