من حكم الشيخ فرح مع ود عجيب

من الطرايف التى تحكى وقد حدثت فى زمن الشيخ فرح ود تكتوك ان هناك رجل يكره هذا الشيخ وكان كلما قال الشيخ حكمه اوكلام يفيد الناس ياتى هذا الرجل بكلام معاكس ليفسد كلام الشيخ وينال الشهره وعندما قال الشيخ فرح
يا بت البدرى
قومى بدرى
وازرعى بدرى
واحصدى بدرى
شوفى كان تنقدرى
ولما اخونا المشاتر سمع بى هذا الكلام قال ( ضل الضحى بطول العمر ) لكى يترك الناس قيام البكور ويتكسرو من قعاد الضلله وطبعا عنقريب ود عجيب الهبابى للناس البجو من الضحوة تعبانين الواحد ما قادر ينزل سرج الحمار وطوالى على العنقريب الهبابى (تحت شجرة ودالغابه)

قصة جميلة يا فقدابي فيها رمزية للحالة التي يعيشها ود عجيب والفعل المضاد

والله يافقدابى الزول (المكاجر) بالعاكس فى ود تكتوك ده اظنو ضارباهو عطلة شديدة خلاص وتلقاهو جنو (جبنات ) اما نحن ناس( ضحويات) و(ضهريات) ساااااااااى الهبابى ده بنجى مشتاقيييين ليه شوق والعجب لامن تكون الواطة مرشوشة وجنبو زير مضروب بلون (الحيمور) وفوقو غطاء بتاع قماش وكوز ظريف وتحتو (لقائ) موئته ناقعة تسمعها طق طق طق وبعد تاخد ليك راحة شوية فوق الهبابى ده
يجيبو ليك الفطور بملاح خدرة البتكمل كسرت الجيران وجنبها شطة بالليمون وقرون شطة خضراء
وبعده الشاى والقهوة وتاخد ليك نووووووووووووووووووووووومة عميقة تلقى الضهر اذن تمشى لصلاة الضهر وتجى تشد سرجك وطوالى الخلاء معاك جركانة موئة (مخيشة ) فى الخرج وفى الجانب التانى
طوريتك في الطين مرمية
كوريتك يابسة ومجدوعة
لا غيبتك كانت مرضية
ولا قولتك كانت مسموعة

فقدابي لك التحية
مع تحفظي على الزول البكاجر في ود تكتوك اعرج خارج النص شوية
رايك شنو في الملاحظة دي
العجب ود عجيب كاسماء
صورة العجب عنقريب هبابي( مطور ومطرز بالبلاستيك)
ود عجيب جاب عنقري هبابي ( معتق) بحتو من وين الله يعلم؟
العجب عربي مقتنع بانتمئه وود عجيب مرة عربي (صر) ومرة ( ودبنادر)
الشيء الاهم ان الاثنين متميزين وود عجيب زايد شوية بحكم انو سنير والعجب لسه برلوم
التحية لكل الاحبة
Rainbow

Rainbow كتب:: فقدابي لك التحية
مع تحفظي على الزول البكاجر في ود تكتوك اعرج خارج النص شوية
رايك شنو في الملاحظة دي
العجب ود عجيب كاسماء
صورة العجب عنقريب هبابي( مطور ومطرز بالبلاستيك)
ود عجيب جاب عنقري هبابي ( معتق) بحتو من وين الله يعلم؟
العجب عربي مقتنع بانتمئه وود عجيب مرة عربي (صر) ومرة ( ودبنادر)
الشيء الاهم ان الاثنين متميزين وود عجيب زايد شوية بحكم انو سنير والعجب لسه برلوم
التحية لكل الاحبة
Rainbow

الغالى رينبو 0هذه هى روعة المنتدى شى عجيب وشى عجب واشياء زرقاء واشياء بى جمبع (الوان الطيف) 0
فقدابى

والله يافقدابى انت الاروع وبعتذر للتاخير ده والاضافة اتت متاخرة بعض الشى والرينبمو اكيد هو تمازج لكل الشخصيات فهو احيانا تشابه كتابه لحد ما كل الاقلام واحائين كثيرة تكون بطعم خاص ونكهة مميزة نكهة الرينمبو واذا كان الرينبمو هو قوس قزح بجميع الوانه الجميلة فانت الشعاع الذى يظهر تلك الالوان
ودمتم لنا .

رسمتك دنيا وردية
كتبتك همسة فوق النيل
وشهدت المراكبية
ما قايل الكتبتو وهم
وما قايل الرسمتو حلم

واكيد لم نكتب وهم ولم نرسم حلم فقط وضعنا تخيلات لدنيا وردية دنيا ملؤها الاحباب والاصحاب ورفقاء القلم نحن نكتب وندع التقييم للاخرين ولو بمرادنا ان نصنع من السريحة لوحة بهية لوحة فنان فنحن فقط نلون ولكن اللوحة موجودة منذ ازمان ابدعتها يد الخالق هذه اللؤلؤة الثمينة والدرة النادرة تحيط بها الخضرة من كل جانب وليتكم رايتمؤها اليوم مع هذا الجو الخريفى المثير وزخات المطر تعطيها جمالا اخاذ تاخذ الالباب وتلهم النفس الشعر. السريحة يادرة الجزيرة الخضراء لله درك .