نجم النجوم( شد حيلك يا الهدهد) على كرسي الاعتراف

يالله يا سقراط الدور على ود عجيب حسب الترتيب التنازلي للعشرة الكبار

ود عجيب جاهز
طيب ابدا انا اولا
1- البطاقة الشخصية
2-لماذا اخترت اسم ود عجيب
3- كيف تعرفت على المنتدى
4- ما هو صدى المنتدى بين اهل السريحة
5- ما رأيك فى مشكلة زرقاء اليمامة ومهاجر
6- هل تصرف مهاجر من الانسحاب من المنتدى صاح ام خطأ
7- امنية لم تتحق بعد
8- ما رأيك فى الاغتراب
9-لو كنت مديرا للمنتدى ما هو اول قرار تصدره
10- وسام التميز من الدرجة الاولى لمن تهديه من اعضاء المنتدى

ارجو من الاخ الادمن وسقراط اعفاءى من هذا الكرسى لانى والله لااجد زمن كافى لانو شغلى بقى خارج المكتب (ميدانى) وبعدين انا يا اخوة ذاكرتى شوية اليومين دول خربة حبتين ولو ملاحظين انا ما دخلت ولو بسؤال !!!!!

انا شايف الاخ الادمن اصر على اذا كان لابد لابد ما مشكلة نجبر خاطرك الغالى
1_ منتصر بابكر عجيب- من مواليد السريحه
2 _ عجيب هو جدى لابى وهو ايضا ماخوذ بالوراثه يعنى عجيب x عجيب لامن الشمس تغيب
ولان عجيب هو بن عبدالله جماع زعيم له تاريخ عظيم فى السودان يمكن الرجوع اليه فى مخططات وكتب المؤرخين العظماء مثل البروفيسر عون الشريف قاسم كما كان والد الشيخ عجيب وشريكه فى الحكم عمارة دنقس يمثلون حكومة السودان منذ1805 واستمرت مملكتهم اكثر من ثلاثمائة عام اليس لى الحق فى ان تشرف بنيل اسم من اسماء هولاء الملوك العظماء الذين غيبهم التاريخ ملوك كانو ملئ السمع والبصر http://www.sudaneseonline.com/cgi-bin/sdb/2bb.cgi?seq=msg&board=13&msg=1078122305&rn=8
3_ تعرفت عليه من زميلى ورفيقى العزيز رياض عبدالعظيم محمدحمد حينما كنت اراسله ففرحت جدا
4_ له اصداء واسعه جدا بين كافة شرائح المجتمع وفئاته خصوصا بعد ان فتح المنتدى ابوابه للوقوف بجانب مدرسة على بن ابى طالب وتبرعاتها
5_لااريد ان افتح هذا الملف من جديد تلك فترة صعيبة جدا ولا اريد حتى ذكرها لانها كانت بجد تمثل محكا ضيق وجدنا انفسنا فيه والحمدلله على مرور العاصفه بسلام بعد ان كادت ان تقتلع المنتدى من جذوره
6_لولا تصرف الاخ مهاجر الذكى وانسحابه لكان هذا الجدال مجهول العواقب مستمرا نتلظى بنيرانه يمنه ويسرا ولكن اكبر فى الاخ مهاجر هذه الصفة صفة الذكاء اذ انسحب تكتيكيا ومن هنا ارسل له رساله ملؤها ايمانى بحنكته وبغيرته على السريحه واهلها ان عود ياخى الامن مستتب
فهو بهذا الانسحاب قد فوت على المغرضين فرصتهم فى استمرار النزاع والتشتت
7 _ ايييييييييييييه الامانى كثيرة واغلبها لم تحقق اولها الزواج وربنا يحقق امانى الجميع
8_ الحمدلله لم اجربه
9_ كنت حسمت موضوع صورة العضو (الترابى) دون الرجوع لاحد
10 _ مناصفة بين ورد وسقراط

الله يا سقراط الزول جبنا ليك جاهز

ودعجيب كتب:: 10 _ مناصفة بين ورد وسقراط

شكرا ليك يا اخي العزيز

واشكرك على شعورك الجميل

واسمح لي اوجه اليك مجموعة من الاسئلة

هي هتكون اسئلة من نوع تاني ما سألتهوش لحد قبلك

بس انا حاسس انها تتناسب معاك

بس ارجو منك انك تعمل كوبي للاسئلة

وبين كل سؤال والتاني توضع الاجابة

وعلى بركة الله نبتدي

اهمية الصلاة بالنسبة لك ؟؟ و قيمتها في نظرك ؟؟ و مدى ارتباطك بيها ؟؟؟

ما قيمة الصيام عندك؟؟ و ما اثره عليك ؟؟

جربت و انت حزين و في عز ضيقك تتوضى و تصلي ركعتين لله ؟؟

جربت تعيط و انت بتشكي لربنا ؟؟ و إيه إحساسك بعد ما عملت كده ؟؟

كتيرر ما بنقابل شخصيات و ناس كتير في حياتنا بس

ممكن نقابل واحد يغير فينا كتيييير !!

ممكن نتعرف على حد يغير من مجرى حياتنا !!

يااااااترى مين الشخصية الي غيرت من مجى حياة ود عجيب ؟؟؟؟!!و غيرتها إزاي ؟؟؟؟

لو كنت عالم نفساوي

و قالولك يا بروف عرفلنا أنواع البشر

يا ترى هتعرفهم و تقول إيه ؟؟

يلا يا باشا

اهمية الصلاة بالنسبة لك ؟؟ و قيمتها في نظرك ؟؟ و مدى ارتباطك بيها ؟؟؟
بسم الله الرحمن الرحيم
قال تعالى: وَأَقِيمُوا الصَّلاةَ وَآتُوا الزَّكَاةَ وَارْكَعُوا مَعَ الرَّاكِعِينَ [البقرة:43]
قال تعالى : حَافِظُوا عَلَى الصَّلَوَاتِ وَالصَّلاةِ الْوُسْطَى وَقُومُوا لِلَّهِ قَانِتِينَ [البقرة:128].
اما فى السنة النبوية الشريفة :
وفي صحيح مسلم، عن عبد الله بن مسعود رضي الله عنه، قال: { لقد رأيتنا وما يتخلف عن الصلاة إلا منافق قد علم نفاقه أو مريض إن كان المريض ليمشي بين رجلين حتى يأتي الصلاة } وقال: { إن رسول الله علمنا سنن الهدى وإن من سنن الهدى الصلاة في المسجد الذي يؤذن فيه }.من هنا تاتى اهمية الصلاة بالنسبة الى اما قيمتها فهى الملاذ وهى الامان
مدى ارتباطى بها فى كل الاوقات المكتوبة اما عن النوافل انشاء الله ربنا يغفر لينا مقصرين والله
ما قيمة الصيام عندك؟؟ و ما اثره عليك ؟؟

الصيام طبعا هو من الفرائض المكتوبة وله عظيم الاثر علينامفيد للصحة وهو وجاء للشباب ووقاء من الوقوع فى الخطائة
جربت و انت حزين و في عز ضيقك تتوضى و تصلي ركعتين لله ؟؟اى والله انا كنت مرة مهموم خالص وعملت كده وياسبحان الله كما النار وطفيتها بالماء

جربت تعيط و انت بتشكي لربنا ؟؟ و إيه إحساسك بعد ما عملت كده ؟؟
للاسف لا والله بس كل يوم بقوم بعد الصلاة بالدعاء

كتيرر ما بنقابل شخصيات و ناس كتير في حياتنا بس

ممكن نقابل واحد يغير فينا كتيييير !!
ايوة ممكن
كتير فى الدنيا بنسافر نعرف ناس حلوين وقليل الببقى فى الخاطر
ممكن نتعرف على حد يغير من مجرى حياتنا !!
اهو زيك كده ياسقراط
يااااااترى مين الشخصية الي غيرت من مجى حياة ود عجيب ؟؟؟؟!!و غيرتها إزاي ؟؟؟؟

والله لو قلت ليكم ماحاتصدقو !!! هى شخصية ممكن تكون مغمورة خالص وحتى هذه اللحظه لا اتذكر اسمه فهو رجل مسن تقريبا فى السبعينيات من عمره وانا كنت وقتها عائش حياتى كما يقولون على كيفى وفترة شباب امكن كلكم مريتو بها وكانت فترة طيش بمعنى كلمة (طيش) ليس الا
جيت فى الحافلة وقعدت جنبيه وبدات اغنى مع صوت الموسيقى المنبعث من راديو العربة
سالنى سوال!!! لازال صداها يتردد على مسامعى لحين كتابتى هذه !! ياترى ايه هو السوال ؟
سوال عادى وما عادى !!! قال لى: يابنى بتصلى ؟؟ قلت ليه ايوة :طيب كم مرة بتصلى على الرسول صلى الله عليه وسلم .
حقيقة احترت وماقدرتش اقول اى حاجة!!! اولا لانى كنت مندهش لسواله والرجل كانه عمى او خالى او او من معارفى فقط كنت ماقدرش اكذب عليه قلت ليه بسيط خالص قال لى جرب ولو فى اليوم 10 مرات شوف حيحصل ايه ؟؟؟ونزلت ومن يومها والحمدلله .جزى الله خيرا هذا الرجل
طبعا اكيد ناس كتير متخيلين حاقول ناس تانين

لو كنت عالم نفساوي

و قالولك يا بروف عرفلنا أنواع البشر

يا ترى هتعرفهم و تقول إيه ؟؟

البشرية انواع ياسقراط تجد من يحبك لله لله ومن يحبك لمتعلقات اخرى هو ادرى بها وتجده يجاملك فى الصاح وفى الغلط( والبشرية انواع )ليست هذه العبارة عنوان محاضرة فى جامعة لكنها محاضرة اخدتها انا بشحمى ولحمى من كمسارى فى حافلة رحت سالته مين الى كتب العبارة دى قال لى انا وقال بالدارجى السودانى اصلو الناس : انواع ناس انناس وناس حصحاص وناس تنداس كل الانواع عرفتها الا الاخيرة دى
ولك ودى الاخ سقراط

1- آخر مرة مشيت فيها الحواشة عملت شنو ومشيت بشنو؟
2-آخر مرة دخلت فيها سوق السريحه اشتريت شنو؟
3-لو ركبت حافلة متجه من الخرطوم للردمية فى وقت بعد المغرب وحينها لم تجد بكاسي للسريحة ماذا ستفعل؟
4- لو ركبت حافلة السريحة متجه الى الخرطوم ووجدت فى الكرسي الامامك الواثق وجيتا والملثم وزرقاء اليمامه جالسين هل ستدفع بدلا عنهم؟
5-لو جاتك مكالمة الساعة 5 صباحا من لجنة مدرسة على بن طالب وطلبوا منك دعم للمدرسة عبر المنتدى ماذا انت فاعل؟
6-لو المريخ قابل فريق شباب السريحه من ستشجع؟
7-لو جاتك فيزا للعمل بدول الخليج هل ستقبل ام لا؟
8-ما هو دور رابطة طلاب السريحة فى مكافحة بعوضة الملاريا بالسريحة؟
9- من هو احسن لاعب كرة قدم / كرة طائرة /بالسريحة فى الوقت الحاضر؟
10-كيف كان شعور عمنا الطيب حاج الصديق وهو يستلم أول دفعة من تبرعات أعضاء المنتدى؟

Admin كتب:: 1- آخر مرة مشيت فيها الحواشة عملت شنو ومشيت بشنو؟

مشيت قبل تلاتة شهور ومشيت برجلى لان الحواشة كما تعرف قريبة من السريحة

2-آخر مرة دخلت فيها سوق السريحه اشتريت شنو؟
اشتريت بطيخ !!!!

3-لو ركبت حافلة متجه من الخرطوم للردمية فى وقت بعد المغرب وحينها لم تجد بكاسي للسريحة ماذا ستفعل؟
تخيل المنظر ده اتطبق فينى الاسبوع الماضى _ حتى الساعة الواحدة انا كنت فى الردمية واخيرا وجدت عربة لتوير شباب عندهم حفلة فى توير وطبعا هم طلبو منى ان امشى معاهم ومن هناك يمكن نلقى عربات السريحة الا اننى رفضت وظللت مستنى الانوار التى تتوهج بين الحين والاخر وماهى الاخيال اظنو (ابو لمبة ) فى كوبرى المكتب قاعد قرابة الساعة والنصف واخيرا اخيرا اقتنعت ومشيت للحفلة و(كدارى ) كمان شفت كيف !! قلت يمكن القى عربية لا لقيت عربية ولا حاجه وطبعا انا ماعندى قضية بالحفلات كما تعلم واخيرا تمت الباقى كدارى للسريحة نمت صحيت بكرة لصلاة الجمعه وواصلت النوم طوالى حتى الليل وراحت على الونسات والشمارات من العيار الثقيل وقعدة الحجر الحلوة المهم جمعه وضاعت

4- لو ركبت حافلة السريحة متجه الى الخرطوم ووجدت فى الكرسي الامامك الواثق وجيتا والملثم وزرقاء اليمامه جالسين هل ستدفع بدلا عنهم؟
قايتو كلهم ماعدا الزرقاء هم قالو قاعدين يصادفونى فى صلاة الجمعه ويمكن الزرقاء برضو بتجى للصلاة ما بستبعد
اما لو صادفتهم فى المواصلات احسن ما اعرفهم تفاديا لدفع التذاكر _ الملثم اظن معرفته ساهلة لانه سيكون (مكمكم)للفائدة ياسقراط عشان ماتتعب هشو هذه الكلمة رديفة لكلمة (ملثم )
طبعا انا بطبيعتى مابعرف تجاهل اى زول بعرفو عشان كده بقعد فى كنبة( شكرا)
5-لو جاتك مكالمة الساعة 5 صباحا من لجنة مدرسة على بن طالب وطلبوا منك دعم للمدرسة عبر المنتدى ماذا انت فاعل؟
والله المشكلة فى النهارية الحارة دى الساعه 5 دى اصلا بكون صاحى لانه بعد الصبح تانى ماعندى نوم

6-لو المريخ قابل فريق شباب السريحه من ستشجع؟
الانتماء للمريخ شرف لايضاهيه شرف اما فريق السريحه فيه من هم هلالاب عشان كده حااشجع المريخ لاشك

7-لو جاتك فيزا للعمل بدول الخليج هل ستقبل ام لا؟
مش اى عمل طبعا اول حاجه حااعمل مقارنة مع راتبى فى السودان والراتب الجديد المفترض وحسابات كتيرة اخرى وبناء عليه ستكون النتيجة

8-ما هو دور رابطة طلاب السريحة فى مكافحة بعوضة الملاريا بالسريحة؟

بالرغم من ان سوالك فيه شئ من روح الدعابة او السخرية ايا كان فالرابطة تقوم با اعباء اكبر بكثير من هذا الذى تقول واظن ان هذا الشق من الاعمال التى تراها صغيرة ونراها نحن بعيون مرضاءنا ونسمع انات وصرخات واوجاع اهلنا لذا نراها كبيرة صحيح ان البعوض صغير الحجم الا انه كبير الضرر لو عملنا مقارنة مع فايروس الايدز وحجمه لوجدنا ضالة الناقل وتفاهته مع حجم الاضرار التى يسببها
فدورالرابطة لم ينحصر بجهة معينة دون اخرى فهى لها اكثر من تسعه مكاتب ولكل مكتب رئيس كفو
انابة عن مكتب الصحه اقول انهم جاهزون لدحرها سواء بالمبيدات او بالتوعية والارشاد وعمل حلقات توعوية عن اهمية استعمال الناموسيات المشبعه وكذلك تجفيف اماكن المياه فى كل شبر
وايضا ردم المستنقعات خصوصا وفصل الخربف على الابواب وهذا منى انا _ للعلم انا رئيس المكتب الاكاديمى

فكونهم اى اعضاء الرابطة تكاتفو من اجل هذه المهمة الصغيرة كما تظن دليل على انهم انتهو من العمليات الكبيرة وهم كبار كبار لاشك هذه البعوضة يمكن تكون دوخت وزارات وولايات باكملها
وانفقت عليها مليارات الجنيهات فى سبيل ان يقضو عليها

9- من هو احسن لاعب كرة قدم / كرة طائرة /بالسريحة فى الوقت الحاضر؟

كرة القدم / احمد نجيب / الطايرة / التقى بابكر احمدصباحى

10-كيف كان شعور عمنا الطيب حاج الصديق وهو يستلم أول دفعة من تبرعات أعضاء المنتدى؟

شعوره كان يمثل شعور كل المتهمين بالمدرسة والله كان بشكر فى كل الذين وقفو الى جانبهم ويدعولهم بالتوفيق والسداد

1- فنانك المفضل

2- هواياتك المفضلة
3-حلم تحقق
4-حلم لم يتحقق
5-مذا تعني لك هذه الكلمات
حب السريحة
عضوية المنتدى
التعليم الجامعي
العطالة
الفقر
الغني
وصف هولاء فى جملة بسيطة:
عبد اللطيف الحاج
على حماد
مهندس حاج طه الصديق
ورد
مهاجر
الادمن
زرقاء اليمامه
سقراط

*لمن تعطي هذه المسميات :-
القلم الذهبي000 مكنسه 000 شهاده تقدير 000 ورده حمراء 000 ورده بيضاء 000 ورقه بيضاء 000 مع ذكر الاسباب؟

-من هو شاعرك المفضل ؟ والكاتب المفضل لديك ؟؟

-كتاب تنصح به الاعضاء بقراءته ؟
من هو اكثر اقسام المنتدى أحب الى قلبك؟

افضل موضوع فى هذا المنتدى

لو خيروك الاشراف على احد الاقسام ماذا ستختار؟

-من هم اكثر الاعضاء الذين تأثرتي بهم و استفدت من مواضيعهم ؟

-مــاهــو الشــئ الذي ندمــتِ علــي عمـلــــه؟!؟

-جــريمــة تتمنـــي لـــو تستطيـــع ارتكابهــــا؟!؟

-كلمة تودِ سماعها كل يوم؟!؟

نمبر وان احب اهنيك على حب الاعضاء ورغبتهم في معرفة المزيد عنك

نمبر تو احب اقولك برافو جدا على اجاباتك التي تتسم بالصراحة

نمبر ثري احب اقولك انا معجب بروح الدعابة الموجودة لديك والواضحة في اغلب اجاباتك

نمبر فور احب اقول لك جزاك الله خيرا عما تقول وتفعل

نمبر فايف اؤكد لك اني سارجع ليك باسئلة اخرى بس اسيبك تجاوب على اخواتك

الشكر لك الاخت بسمةعلى هذا الحوار
1__ مصطفى سيد احمد له الرحمة والمغفر ة
2_ تصفح النت
3-ةحلم تحقق_ الجامعه
4-حلم لم يتحقق_ الزواج
5_
-مذا تعني لك هذه الكلمات
حب السريحة
احلى بقعه
عضوية المنتدى؟ شرف لى ان اكون بجانب العمالقة الكبار

التعليم الجامعي : وسام نقلده لاباءنا فهم من اوصلونا اليه
العطالة: قاسية ومرة
الفقر: لو كان رجلا لقتلته .كما قال عمربن الخطاب
الغني: امتحان
وصف هولاء فى جملة بسيطة:
عبد اللطيف الحاج: رمز وثروة قومية
على حماد: رجل والرجال قلائل واستاذ استفادت منه اجيال كثيرة
مهندس حاج طه الصديق:رجل كريم وذو عقل كبير(ماشاء الله) و منهل من مناهل العلم ذو ثقافة عالية
ورد: بالرغم من انى لم التقيه وجها لوجه الا انه انسان بمعنى الكلمة كانى اعرفه منذ زمن بعيد
مهاجر: حصيف
الادمن: اهلا للعطاء واهلا للاحترام والتقدير
زرقاء اليمامه : عضوة نشطة بس لو تخلى التجريح ده
سقراط: لوحة من الابداع [/b]

وكذلك الشكر لك الزرقاء

*لمن تعطي هذه المسميات :-
القلم الذهبي000 مكنسه 000 شهاده تقدير 000 ورده حمراء 000 ورده بيضاء 000 ورقه بيضاء 000 مع ذكر الاسباب؟
القلم الذهبى : لحمد النيل
مكنسة: لكل صاحب فكر هدام
شهادة تقدير : عبدالمنعم عبدالله الترابى معتمد محلية الكاملين لوقفته مع مدرسة على بن ابى طالب للاساس بالسريحة
وردة حمراء :سقراط لابداعاته المتجددة
وردة بيضاء: ورد لتناوله المواضيع بكل شفافية
ورقة بيضاء : ايه دى شيك ولا ايه ؟؟ لو كانت كده تبقى لى انا اما ان كانت (فاضية ) خليها معاك امكن تنفع !!
ووردة اخرى : هدية للاخ بهيج _ للصداقة

-من هو شاعرك المفضل ؟ والكاتب المفضل لديك ؟؟ ازهرى محمد على _ لانه شاعر ابو السيد
والكاتب الطيب صالح لانه اعطى للرواية السودانية الوهج العالمى

-كتاب تنصح به الاعضاء بقراءته ؟ القراءن الكريم لانه كتلوج السعادة الابدية

ما هو اكثر اقسام المنتدى أحب الى قلبك؟ المنتدى الاسلامى مع قلة كتاباتى فيه لاننى بخشى من الخطاء فى هذه المواضيع

افضل موضوع فى هذا المنتدى: ( السريحة فى قلوبنا )ليس لاننى كاتبه ولكن لانه هو الشغل الشاغل لكل المهتمين بقضايا السريحة هذه الايام خصوصا مدرسة على بن ابى طالب

لو خيروك الاشراف على احد الاقسام ماذا ستختار؟ ركن النقاش

-من هم اكثر الاعضاء الذين تأثرت بهم و استفدت من مواضيعهم ؟
مولانا _ حمد النيل

-مــاهــو الشــئ الذي ندمــتِ علــي عمـلــــه؟!؟ اننى لم انضم لهذه الكوكبة من اول يوم

-جــريمــة تتمنـــي لـــو تستطيـــع ارتكابهــــا؟!؟ حب الوطن

-كلمة تودِ سماعها كل يوم؟!؟ التهليل والتكبير

حاتم سقراط كتب:: نمبر وان احب اهنيك على حب الاعضاء ورغبتهم في معرفة المزيد عنك

نمبر تو احب اقولك برافو جدا على اجاباتك التي تتسم بالصراحة

نمبر ثري احب اقولك انا معجب بروح الدعابة الموجودة لديك والواضحة في اغلب اجاباتك

نمبر فور احب اقول لك جزاك الله خيرا عما تقول وتفعل

نمبر فايف اؤكد لك اني سارجع ليك باسئلة اخرى بس اسيبك تجاوب على اخواتك

شكرا لك سقراط وللاخوة وانا لا اخشى من سخونة الكرسى بقدر ما اخاف على زمنى وماشاء الله الجماعة ما صدقو ولقو فرصتم وانا متاكد فى جماعة تانين ببحثو عن الفرصة دى من بدرى واتمنى ان لايكتشفوها حتى انتهى من اسئلتكم دى !!! انتو ياجماعة (عايزين تخربو بيتى والا ايه؟؟؟؟؟ )

ودعجيب كتب:: الفقر: لو كان رجلا لقتلته .كما قال عمربن الخطاب

سقراط[/b]: لوحة من الابداع [/color][/b]

اعتقد ان قائل هذه المقولة هو علي بن ابي طالب

شكرا على الكلام الجميل وانت بتخجلني يوم ورا يوم حبيبي

العمر كله ود عجيب منوورنا

طيب هسألك أسأله عاديه

لونك المفضل؟

رقمك المفضل؟

أسماء تحبهم بنات؟

أسماء ولاد؟

أخر دمعة نزلت منك كآنت إيه سببهآ وإمتى ؟

شخص بتقوله (بكرهك) ومآ تقولى مفيش وترد بدوبلومآسية ؟

بتتمنى فى اللحظة دية دلوقتى اية ؟

عيوب شووفتهآ فى المنتدى ؟

أشخآص نفسك تتعرف عليهم فى المنتدى ويكون لك كلآم معآهم ؟

ممكن تسآمح حد جرحك بكلآم كبير وهآن كرآمتك ؟

أخر هدية جتلك وآخر هدية جيتهآ كآنوآ لمين ؟

حــاليا بتحــب ولا كـنت بتحـب . ولا محصلش وحبيت خالص .. وأيه شعورك عن الحب عموما ؟

تفضل تبدأ حب صادق من النت مع وجود كامل الصراحه بين الطرفين وطبعا تكونوا شوفتو بعض كام أو صور وتفهموا كل حاجه مع بعضكم نت .. ولا تفضلها يكون حب عن طريق الحياه لايف يعني ؟

خـرجت مـع بنــات قبل كده ولا لا .. ؟

بتشـرب سجـاير أو أي نوع مـن أنـواع المكيفــات ولا لاء ؟

..

أكـتر أكله بتحـبهــا أيه .. ؟

احكيلي يوم من أيامك العاديه بتصحى الصبح تفطر ايه تنزل ولا تعد في البيت تخرج تروح حته ولا

لا ولو خرجت بتروح فين أحكيلي يوم كامل بتعمل فيه أيه ؟

ود عجيب لك التحية
عندي ليك سؤال واحد بس ولكن صعب شوية عاوز منك شجاعة وروح رياضية
/
/
/
/
/
/
/
/
/
/
/
لو خيرت بان تتزوج من القبائل التاية فماذا تختار ولماذ؟
العبدلاب
الكمامة
آل جيد
الكواهلة
آل خوجلي
آل الغابة
آل عامر
آل بساطي
آل الشايقي
آل فضل الجليل
آل العالي

اشكرك الاخ ورد على التصحيح فى مقولة لوكان الفقر رجلا بس ياحبيبى الاستعجال وبعدين الواحد مابلقى زمن للرد على كل الاسئلة اهو يكون مستعجل ونهاية المطاف اخطاء فلكم العتبى حتى ترضو

لونك المفضل؟ اللون الاحمر
رقمك المفضل؟ الرقم ثمانية من وانا صغير بحبه

أسماء تحبهم بنات؟ سندس

أسماء ولاد؟ ابن اختى برعى

أخر دمعة نزلت منك كآنت إيه سببهآ وإمتى ؟ فى وفاة المرحوم محمد ابراهيم الحاج له الرحمة والمغفرة وربنا يسكنه فسيح جناته مع الصدقين والشهداء وحسن اولئك رفيقا ارجو منكم قراءة الفاتحه لروحه الطيبة انشاء الله

شخص بتقوله (بكرهك) ومآ تقولى مفيش وترد بدوبلومآسية ؟ القرد بوش والسبب معروف

بتتمنى فى اللحظة دية دلوقتى اية ؟ بتمنى احج بيت الله

عيوب شووفتهآ فى المنتدى ؟ المهاترات والتجريح بدون اسباب

أشخآص نفسك تتعرف عليهم فى المنتدى ويكون لك كلآم معآهم ؟ ماك /جازيه الكرخ / بسمة

ممكن تسآمح حد جرحك بكلآم كبير وهآن كرآمتك ؟ ممكن المسامح كريم

أخر هدية جتلك وآخر هدية جيتهآ كآنوآ ؟؟ رصيد من سندس + رسالة حلوة
اما اخر هدية اعطيتها _ كانت صباح اليوم للوالدة ربنا يديها العافية (ثوب و حذاء ) كانت دعواتها لى بالعافية اغلى من سعرها الاف الاضعاف !!

خالد البشير الشيخ كتب:: ود عجيب لك التحية
عندي ليك سؤال واحد بس ولكن صعب شوية عاوز منك شجاعة وروح رياضية
/
/
/
/
/
/
/
/
/
/
/
لو خيرت بان تتزوج من القبائل التاية فماذا تختار ولماذ؟
العبدلاب
الكمامة
آل جيد
الكواهلة
آل خوجلي
آل الغابة
آل عامر
آل بساطي
آل الشايقي
آل فضل الجليل
آل العالي

ماقدرش ياخالد سوالك اصعب سوال وجه لى فى حياتى
ياريت ياريت تعفينى منه !!!!!!!!!!!!!!!

اجاوب ليك انا يا ود عجيب
آل جيد
ليه دي تجاوب عليها انت

زرقاء اليمامة كتب:: اجاوب ليك انا يا ود عجيب
آل جيد
ليه دي تجاوب عليها انت

إشمعنا يعني ناس جيد؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!
انت منهم و لا شنو؟؟

طيب يا ود عجيب
اخونا خالد فتح لينا مجال جديد نخوض فيه
سؤالي
لو خيرت بأن تتزوج على احدى الطرق التالية فماذا تختار:
1- عرس جماعي فى الاستاد
2- عرس الكورة
3- عرس الترف والزخم الاعلامي من حفلات وحنن وشيلة ومهر بالملايين

Admin كتب:: طيب يا ود عجيب
اخونا خالد فتح لينا مجال جديد نخوض فيه
سؤالي
لو خيرت بأن تتزوج على احدى الطرق التالية فماذا تختار:
1- عرس جماعي فى الاستاد
2- عرس الكورة
3- عرس الترف والزخم الاعلامي من حفلات وحنن وشيلة ومهر بالملايين

طبعا يامحمد انا بريد الاستادات ريدة مبالغة مرات بدون ارادة تلقانى ركبت مواصلات الاستاد حتى ولو ماشى لبحرى المهم عندى جن اسمو الاستاد عشان كده بختار العرس الجماعى والنقل الجماعى وياريت كمان تكون فى مباراة من شوط واحد مريخ وهلال على شرف الزواج وكده
واى حاجه فيها الجماعه انا بحبذها شديد والموت مع الجماعة عرس اقصد عيد

اجابه ولا احلى بس لكن كنت تفرق بين الاستادات وتقول الاستاد الاحمر
طيب عندي ليك سؤال ثاني
س: احد اصدقائك اتبرع بحفلة العرس وخيرك فى ان تختار الآتي من المطربين:-
1- سيف السريحة
2- الجنيد
3-عبد العزيز الحلاوي
4-محمد الامين الاحمر
5-كيتة
6- دلوكة حارة فى الجرتق بطليب

طبعا وبدون تفكير (دلوكة من العصير) والله كان (محنن) الا اعرض صقرية وطبعا العرضى ده انا ماخد فيه ماجستير